૧૦. ખત્તિયસુત્તં

૫૨. અથ ખો જાણુસ્સોણિ [જાણુસોણિ (ક.)] બ્રાહ્મણો યેન ભગવા તેનુપસઙ્કમિ; ઉપસઙ્કમિત્વા ભગવતા સદ્ધિં સમ્મોદિ. સમ્મોદનીયં કથં સારણીયં વીતિસારેત્વા એકમન્તં નિસીદિ. એકમન્તં નિસિન્નો ખો જાણુસ્સોણિ બ્રાહ્મણો ભગવન્તં એતદવોચ –

‘‘ખત્તિયા, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘ખત્તિયા ખો, બ્રાહ્મણ, ભોગાધિપ્પાયા પઞ્ઞૂપવિચારા બલાધિટ્ઠાના પથવીભિનિવેસા ઇસ્સરિયપરિયોસાના’’તિ.

‘‘બ્રાહ્મણા પન, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘બ્રાહ્મણા ખો, બ્રાહ્મણ, ભોગાધિપ્પાયા પઞ્ઞૂપવિચારા મન્તાધિટ્ઠાના યઞ્ઞાભિનિવેસા બ્રહ્મલોકપરિયોસાના’’તિ.

‘‘ગહપતિકા પન, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘ગહપતિકા ખો, બ્રાહ્મણ, ભોગાધિપ્પાયા પઞ્ઞૂપવિચારા સિપ્પાધિટ્ઠાના કમ્મન્તાભિનિવેસા નિટ્ઠિતકમ્મન્તપરિયોસાના’’તિ.

‘‘ઇત્થી પન, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘ઇત્થી ખો, બ્રાહ્મણ, પુરિસાધિપ્પાયા અલઙ્કારૂપવિચારા પુત્તાધિટ્ઠાના અસપતીભિનિવેસા ઇસ્સરિયપરિયોસાના’’તિ.

‘‘ચોરા પન, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘ચોરા ખો, બ્રાહ્મણ, આદાનાધિપ્પાયા ગહનૂપવિચારા સત્થાધિટ્ઠાના અન્ધકારાભિનિવેસા અદસ્સનપરિયોસાના’’તિ.

‘‘સમણા પન, ભો ગોતમ, કિંઅધિપ્પાયા, કિંઉપવિચારા, કિંઅધિટ્ઠાના, કિંઅભિનિવેસા, કિંપરિયોસાના’’તિ? ‘‘સમણા ખો, બ્રાહ્મણ, ખન્તિસોરચ્ચાધિપ્પાયા પઞ્ઞૂપવિચારા સીલાધિટ્ઠાના આકિઞ્ચઞ્ઞાભિનિવેસા [અકિઞ્ચનાભિનિવેસા (સ્યા. ક.)] નિબ્બાનપરિયોસાના’’તિ.

‘‘અચ્છરિયં, ભો ગોતમ, અબ્ભુતં, ભો ગોતમ! ખત્તિયાનમ્પિ ભવં ગોતમો જાનાતિ અધિપ્પાયઞ્ચ ઉપવિચારઞ્ચ અધિટ્ઠાનઞ્ચ અભિનિવેસઞ્ચ પરિયોસાનઞ્ચ. બ્રાહ્મણાનમ્પિ ભવં ગોતમો જાનાતિ…પે… ગહપતીનમ્પિ ભવં ગોતમો જાનાતિ… ઇત્થીનમ્પિ ભવં ગોતમો જાનાતિ… ચોરાનમ્પિ ભવં ગોતમો જાનાતિ … સમણાનમ્પિ ભવં ગોતમો જાનાતિ અધિપ્પાયઞ્ચ ઉપવિચારઞ્ચ અધિટ્ઠાનઞ્ચ અભિનિવેસઞ્ચ પરિયોસાનઞ્ચ. અભિક્કન્તં, ભો ગોતમ…પે… ઉપાસકં મં ભવં ગોતમો ધારેતુ અજ્જતગ્ગે પાણુપેતં સરણં ગત’’ન્તિ. દસમં.