૮. દુતિયઅપાસાદિકસુત્તં

૨૧૮. ‘‘પઞ્ચિમે, ભિક્ખવે, આદીનવા અપાસાદિકે. કતમે પઞ્ચ? અપ્પસન્ના નપ્પસીદન્તિ, પસન્નાનઞ્ચ એકચ્ચાનં અઞ્ઞથત્તં હોતિ, સત્થુસાસનં અકતં [ન કતં (સ્યા. કં. ક.)] હોતિ, પચ્છિમા જનતા દિટ્ઠાનુગતિં આપજ્જતિ, ચિત્તમસ્સ નપ્પસીદતિ. ઇમે ખો, ભિક્ખવે, પઞ્ચ આદીનવા અપાસાદિકે.

‘‘પઞ્ચિમે, ભિક્ખવે, આનિસંસા પાસાદિકે. કતમે પઞ્ચ? અપ્પસન્ના પસીદન્તિ, પસન્નાનઞ્ચ ભિય્યોભાવો હોતિ, સત્થુસાસનં કતં હોતિ, પચ્છિમા જનતા દિટ્ઠાનુગતિં આપજ્જતિ, ચિત્તમસ્સ પસીદતિ. ઇમે ખો, ભિક્ખવે, પઞ્ચ આનિસંસા પાસાદિકે’’તિ. અટ્ઠમં.