૮. દુતિયઅનાગતભયસુત્તં

૭૮. ‘‘પઞ્ચિમાનિ, ભિક્ખવે, અનાગતભયાનિ સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. કતમાનિ પઞ્ચ? ઇધ, ભિક્ખવે, ભિક્ખુ ઇતિ પટિસઞ્ચિક્ખતિ – ‘અહં ખો એતરહિ દહરો યુવા સુસુકાળકેસો ભદ્રેન યોબ્બનેન સમન્નાગતો પઠમેન વયસા. હોતિ ખો પન સો સમયો યં ઇમં કાયં જરા ફુસતિ. જિણ્ણેન ખો પન જરાય અભિભૂતેન ન સુકરં બુદ્ધાનં સાસનં મનસિ કાતું, ન સુકરાનિ અરઞ્ઞવનપત્થાનિ પન્તાનિ સેનાસનાનિ પટિસેવિતું. પુરા મં સો ધમ્મો આગચ્છતિ અનિટ્ઠો અકન્તો અમનાપો; હન્દાહં પટિકચ્ચેવ [પટિગચ્ચેવ (સી.)] વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય, યેનાહં ધમ્મેન સમન્નાગતો જિણ્ણકોપિ ફાસું [ફાસુ (પી. ક.)] વિહરિસ્સામી’તિ. ઇદં, ભિક્ખવે, પઠમં અનાગતભયં સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય.

‘‘પુન ચપરં, ભિક્ખવે, ભિક્ખુ ઇતિ પટિસઞ્ચિક્ખતિ – ‘અહં ખો એતરહિ અપ્પાબાધો અપ્પાતઙ્કો સમવેપાકિનિયા ગહણિયા સમન્નાગતો નાતિસીતાય નાચ્ચુણ્હાય મજ્ઝિમાય પધાનક્ખમાય. હોતિ ખો પન સો સમયો યં ઇમં કાયં બ્યાધિ ફુસતિ. બ્યાધિતેન ખો પન બ્યાધિના અભિભૂતેન [બ્યાધાભિભૂતેન (સી. પી. ક.)] ન સુકરં બુદ્ધાનં સાસનં મનસિ કાતું, ન સુકરાનિ અરઞ્ઞવનપત્થાનિ પન્તાનિ સેનાસનાનિ પટિસેવિતું. પુરા મં સો ધમ્મો આગચ્છતિ અનિટ્ઠો અકન્તો અમનાપો; હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય, યેનાહં ધમ્મેન સમન્નાગતો બ્યાધિતોપિ ફાસું વિહરિસ્સામી’તિ. ઇદં, ભિક્ખવે, દુતિયં અનાગતભયં સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય.

‘‘પુન ચપરં, ભિક્ખવે, ભિક્ખુ ઇતિ પટિસઞ્ચિક્ખતિ – ‘એતરહિ ખો સુભિક્ખં સુસસ્સં સુલભપિણ્ડં, સુકરં ઉઞ્છેન પગ્ગહેન યાપેતું. હોતિ ખો પન સો સમયો યં દુબ્ભિક્ખં હોતિ દુસ્સસ્સં દુલ્લભપિણ્ડં, ન સુકરં ઉઞ્છેન પગ્ગહેન યાપેતું. દુબ્ભિક્ખે ખો પન મનુસ્સા યેન સુભિક્ખં તેન સઙ્કમન્તિ [તેનુપસઙ્કમન્તિ (ક.)]. તત્થ સઙ્ગણિકવિહારો હોતિ આકિણ્ણવિહારો. સઙ્ગણિકવિહારે ખો પન સતિ આકિણ્ણવિહારે ન સુકરં બુદ્ધાનં સાસનં મનસિ કાતું, ન સુકરાનિ અરઞ્ઞવનપત્થાનિ પન્તાનિ સેનાસનાનિ પટિસેવિતું. પુરા મં સો ધમ્મો આગચ્છતિ અનિટ્ઠો અકન્તો અમનાપો; હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય, યેનાહં ધમ્મેન સમન્નાગતો દુબ્ભિક્ખેપિ ફાસુ વિહરિસ્સામી’તિ. ઇદં, ભિક્ખવે, તતિયં અનાગતભયં સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય.

‘‘પુન ચપરં, ભિક્ખવે, ભિક્ખુ ઇતિ પટિસઞ્ચિક્ખતિ – ‘એતરહિ ખો મનુસ્સા સમગ્ગા સમ્મોદમાના અવિવદમાના ખીરોદકીભૂતા અઞ્ઞમઞ્ઞં પિયચક્ખૂહિ સમ્પસ્સન્તા વિહરન્તિ. હોતિ ખો પન સો સમયો યં ભયં હોતિ અટવિસઙ્કોપો, ચક્કસમારૂળ્હા જાનપદા પરિયાયન્તિ. ભયે ખો પન સતિ મનુસ્સા યેન ખેમં તેન સઙ્કમન્તિ. તત્થ સઙ્ગણિકવિહારો હોતિ આકિણ્ણવિહારો. સઙ્ગણિકવિહારે ખો પન સતિ આકિણ્ણવિહારે ન સુકરં બુદ્ધાનં સાસનં મનસિ કાતું, ન સુકરાનિ અરઞ્ઞવનપત્થાનિ પન્તાનિ સેનાસનાનિ પટિસેવિતું. પુરા મં સો ધમ્મો આગચ્છતિ અનિટ્ઠો અકન્તો અમનાપો; હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય, યેનાહં ધમ્મેન સમન્નાગતો ભયેપિ ફાસું વિહરિસ્સામી’તિ. ઇદં, ભિક્ખવે, ચતુત્થં અનાગતભયં સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય.

‘‘પુન ચપરં, ભિક્ખવે, ભિક્ખુ ઇતિ પટિસઞ્ચિક્ખતિ – ‘એતરહિ ખો સઙ્ઘો સમગ્ગો સમ્મોદમાનો અવિવદમાનો એકુદ્દેસો ફાસુ વિહરતિ. હોતિ ખો પન સો સમયો યં સઙ્ઘો ભિજ્જતિ. સઙ્ઘે ખો પન ભિન્ને ન સુકરં બુદ્ધાનં સાસનં મનસિ કાતું, ન સુકરાનિ અરઞ્ઞવનપત્થાનિ પન્તાનિ સેનાસનાનિ પટિસેવિતું. પુરા મં સો ધમ્મો આગચ્છતિ અનિટ્ઠો અકન્તો અમનાપો; હન્દાહં પટિકચ્ચેવ વીરિયં આરભામિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય, યેનાહં ધમ્મેન સમન્નાગતો ભિન્નેપિ સઙ્ઘે ફાસું વિહરિસ્સામી’તિ. ઇદં, ભિક્ખવે, પઞ્ચમં અનાગતભયં સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય.

‘‘ઇમાનિ ખો, ભિક્ખવે, પઞ્ચ અનાગતભયાનિ સમ્પસ્સમાનેન અલમેવ ભિક્ખુના અપ્પમત્તેન આતાપિના પહિતત્તેન વિહરિતું અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાયા’’તિ. અટ્ઠમં.