૯. તતિયઅનાગતભયસુત્તં

૭૯. ‘‘પઞ્ચિમાનિ, ભિક્ખવે, અનાગતભયાનિ એતરહિ અસમુપ્પન્નાનિ આયતિં સમુપ્પજ્જિસ્સન્તિ. તાનિ વો [ખો (કત્થચિ)] પટિબુજ્ઝિતબ્બાનિ; પટિબુજ્ઝિત્વા ચ તેસં પહાનાય વાયમિતબ્બં.

‘‘કતમાનિ પઞ્ચ? ભવિસ્સન્તિ, ભિક્ખવે, ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞે ઉપસમ્પાદેસ્સન્તિ. તેપિ [તે (સી.)] ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞે ઉપસમ્પાદેસ્સન્તિ. તેપિ [તે (?)] ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, પઠમં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.

‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞેસં નિસ્સયં દસ્સન્તિ. તેપિ ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અઞ્ઞેસં નિસ્સયં દસ્સન્તિ. તેપિ ન સક્ખિસ્સન્તિ વિનેતું અધિસીલે અધિચિત્તે અધિપઞ્ઞાય. તેપિ ભવિસ્સન્તિ અભાવિતકાયા અભાવિતસીલા અભાવિતચિત્તા અભાવિતપઞ્ઞા. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, દુતિયં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.

‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા અભિધમ્મકથં વેદલ્લકથં કથેન્તા કણ્હધમ્મં ઓક્કમમાના ન બુજ્ઝિસ્સન્તિ. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, તતિયં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.

‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા યે તે સુત્તન્તા તથાગતભાસિતા ગમ્ભીરા ગમ્ભીરત્થા લોકુત્તરા સુઞ્ઞતાપ્પટિસંયુત્તા, તેસુ ભઞ્ઞમાનેસુ ન સુસ્સૂસિસ્સન્તિ, ન સોતં ઓદહિસ્સન્તિ, ન અઞ્ઞા ચિત્તં ઉપટ્ઠપેસ્સન્તિ, ન ચ તે ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ. યે પન તે સુત્તન્તા કવિતા [કવિકતા (સી. સ્યા. કં. પી., સં. નિ. ૨.૨૨૯) ટીકા ઓલોકેતબ્બા] કાવેય્યા ચિત્તક્ખરા ચિત્તબ્યઞ્જના બાહિરકા સાવકભાસિતા, તેસુ ભઞ્ઞમાનેસુ સુસ્સૂસિસ્સન્તિ, સોતં ઓદહિસ્સન્તિ, અઞ્ઞા ચિત્તં ઉપટ્ઠપેસ્સન્તિ, તે ચ ધમ્મે ઉગ્ગહેતબ્બં પરિયાપુણિતબ્બં મઞ્ઞિસ્સન્તિ. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, ચતુત્થં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં.

‘‘પુન ચપરં, ભિક્ખવે, ભવિસ્સન્તિ ભિક્ખૂ અનાગતમદ્ધાનં અભાવિતકાયા અભાવિતસીલા અભાવિતચિત્તા અભાવિતપઞ્ઞા. તે અભાવિતકાયા સમાના અભાવિતસીલા અભાવિતચિત્તા અભાવિતપઞ્ઞા થેરા ભિક્ખૂ બાહુલિકા [બાહુલ્લિકા (સ્યા. કં.) અ. નિ. ૨.૪૯; ૩.૯૬] ભવિસ્સન્તિ સાથલિકા ઓક્કમને પુબ્બઙ્ગમા પવિવેકે નિક્ખિત્તધુરા, ન વીરિયં આરભિસ્સન્તિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. તેસં પચ્છિમા જનતા દિટ્ઠાનુગતિં આપજ્જિસ્સતિ. સાપિ ભવિસ્સતિ બાહુલિકા સાથલિકા ઓક્કમને પુબ્બઙ્ગમા પવિવેકે નિક્ખિત્તધુરા, ન વીરિયં આરભિસ્સતિ અપ્પત્તસ્સ પત્તિયા અનધિગતસ્સ અધિગમાય અસચ્છિકતસ્સ સચ્છિકિરિયાય. ઇતિ ખો, ભિક્ખવે, ધમ્મસન્દોસા વિનયસન્દોસો; વિનયસન્દોસા ધમ્મસન્દોસો. ઇદં, ભિક્ખવે, પઞ્ચમં અનાગતભયં એતરહિ અસમુપ્પન્નં આયતિં સમુપ્પજ્જિસ્સતિ. તં વો પટિબુજ્ઝિતબ્બં; પટિબુજ્ઝિત્વા ચ તસ્સ પહાનાય વાયમિતબ્બં. ‘‘ઇમાનિ ખો, ભિક્ખવે, પઞ્ચ અનાગતભયાનિ એતરહિ અસમુપ્પન્નાનિ આયતિં સમુપ્પજ્જિસ્સન્તિ. તાનિ વો પટિબુજ્ઝિતબ્બાનિ; પટિબુજ્ઝિત્વા ચ તેસં પહાનાય વાયમિતબ્બ’’ન્તિ. નવમં.