(૨૫) ૫. આપત્તિભયવગ્ગો

૧. સઙ્ઘભેદકસુત્તં

૨૪૩. એકં સમયં ભગવા કોસમ્બિયં વિહરતિ ઘોસિતારામે. અથ ખો આયસ્મા આનન્દો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નં ખો આયસ્મન્તં આનન્દં ભગવા એતદવોચ – ‘‘અપિ નુ તં, આનન્દ, અધિકરણં વૂપસન્ત’’ન્તિ? ‘‘કુતો તં, ભન્તે, અધિકરણં વૂપસમિસ્સતિ [વૂપસમ્મિસ્સતિ (?)]! આયસ્મતો, ભન્તે, અનુરુદ્ધસ્સ બાહિયો નામ સદ્ધિવિહારિકો કેવલકપ્પં સઙ્ઘભેદાય ઠિતો. તત્રાયસ્મા અનુરુદ્ધો ન એકવાચિકમ્પિ ભણિતબ્બં મઞ્ઞતી’’તિ.

‘‘કદા પનાનન્દ, અનુરુદ્ધો સઙ્ઘમજ્ઝે અધિકરણેસુ [અધિકરણેસુ તેસુ (ક.)] વોયુઞ્જતિ! નનુ, આનન્દ, યાનિ કાનિચિ અધિકરણાનિ ઉપ્પજ્જન્તિ, સબ્બાનિ તાનિ તુમ્હે ચેવ વૂપસમેથ સારિપુત્તમોગ્ગલ્લાના ચ.

‘‘ચત્તારોમે, આનન્દ, અત્થવસે સમ્પસ્સમાનો પાપભિક્ખુ સઙ્ઘભેદેન નન્દતિ. કતમે ચત્તારો? ઇધાનન્દ, પાપભિક્ખુ દુસ્સીલો હોતિ પાપધમ્મો અસુચિ સઙ્કસ્સરસમાચારો પટિચ્છન્નકમ્મન્તો અસ્સમણો સમણપટિઞ્ઞો અબ્રહ્મચારી બ્રહ્મચારિપટિઞ્ઞો અન્તોપૂતિ અવસ્સુતો કસમ્બુજાતો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – દુસ્સીલો પાપધમ્મો અસુચિ સઙ્કસ્સરસમાચારો પટિચ્છન્નકમ્મન્તો અસ્સમણો સમણપટિઞ્ઞો અબ્રહ્મચારી બ્રહ્મચારિપટિઞ્ઞો અન્તોપૂતિ અવસ્સુતો કસમ્બુજાતોતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, પઠમં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.

‘‘પુન ચપરં, આનન્દ, પાપભિક્ખુ મિચ્છાદિટ્ઠિકો હોતિ, અન્તગ્ગાહિકાય દિટ્ઠિયા સમન્નાગતો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – મિચ્છાદિટ્ઠિકો અન્તગ્ગાહિકાય દિટ્ઠિયા સમન્નાગતોતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, દુતિયં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.

‘‘પુન ચપરં, આનન્દ, પાપભિક્ખુ મિચ્છાઆજીવો હોતિ, મિચ્છાઆજીવેન જીવિકં [જીવિતં (સ્યા. કં. પી. ક.)] કપ્પેતિ. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – મિચ્છાઆજીવો મિચ્છાઆજીવેન જીવિકં કપ્પેતીતિ, સમગ્ગા મં સન્તા નાસેસ્સન્તિ; વગ્ગા પન મં ન નાસેસ્સન્તી’તિ. ઇદં, આનન્દ, તતિયં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ.

‘‘પુન ચપરં, આનન્દ, પાપભિક્ખુ લાભકામો હોતિ સક્કારકામો અનવઞ્ઞત્તિકામો. તસ્સ એવં હોતિ – ‘સચે ખો મં ભિક્ખૂ જાનિસ્સન્તિ – લાભકામો સક્કારકામો અનવઞ્ઞત્તિકામોતિ, સમગ્ગા મં સન્તા ન સક્કરિસ્સન્તિ ન ગરું કરિસ્સન્તિ ન માનેસ્સન્તિ ન પૂજેસ્સન્તિ; વગ્ગા પન મં સક્કરિસ્સન્તિ ગરું કરિસ્સન્તિ માનેસ્સન્તિ પૂજેસ્સન્તી’તિ. ઇદં, આનન્દ, ચતુત્થં અત્થવસં સમ્પસ્સમાનો પાપભિક્ખુ સઙ્ઘભેદેન નન્દતિ. ઇમે ખો, આનન્દ, ચત્તારો અત્થવસે સમ્પસ્સમાનો પાપભિક્ખુ સઙ્ઘભેદેન નન્દતી’’તિ. પઠમં.

૨. આપત્તિભયસુત્તં

૨૪૪. ‘‘ચત્તારિમાનિ, ભિક્ખવે, આપત્તિભયાનિ. કતમાનિ ચત્તારિ? સેય્યથાપિ, ભિક્ખવે, ચોરં આગુચારિં ગહેત્વા રઞ્ઞો દસ્સેય્યું – ‘અયં તે, દેવ, ચોરો આગુચારી. ઇમસ્સ દેવો દણ્ડં પણેતૂ’તિ. તમેનં રાજા એવં વદેય્ય – ‘ગચ્છથ, ભો, ઇમં પુરિસં દળ્હાય રજ્જુયા પચ્છાબાહં ગાળ્હબન્ધનં બન્ધિત્વા ખુરમુણ્ડં કરિત્વા ખરસ્સરેન પણવેન રથિકાય રથિકં સિઙ્ઘાટકેન સિઙ્ઘાટકં પરિનેત્વા દક્ખિણેન દ્વારેન નિક્ખામેત્વા દક્ખિણતો નગરસ્સ સીસં છિન્દથા’તિ. તમેનં રઞ્ઞો પુરિસા દળ્હાય રજ્જુયા પચ્છાબાહં ગાળ્હબન્ધનં બન્ધિત્વા ખુરમુણ્ડં કરિત્વા ખરસ્સરેન પણવેન રથિકાય રથિકં સિઙ્ઘાટકેન સિઙ્ઘાટકં પરિનેત્વા દક્ખિણેન દ્વારેન નિક્ખામેત્વા દક્ખિણતો નગરસ્સ સીસં છિન્દેય્યું. તત્રઞ્ઞતરસ્સ થલટ્ઠસ્સ પુરિસસ્સ એવમસ્સ – ‘પાપકં વત, ભો, અયં પુરિસો કમ્મં અકાસિ ગારય્હં સીસચ્છેજ્જં. યત્ર હિ નામ રઞ્ઞો પુરિસા દળ્હાય રજ્જુયા પચ્છાબાહં ગાળ્હબન્ધનં બન્ધિત્વા ખુરમુણ્ડં કરિત્વા ખરસ્સરેન પણવેન રથિકાય રથિકં સિઙ્ઘાટકેન સિઙ્ઘાટકં પરિનેત્વા દક્ખિણેન દ્વારેન નિક્ખામેત્વા દક્ખિણતો નગરસ્સ સીસં છિન્દિસ્સન્તિ! સો વતસ્સાહં [સો વતસ્સાયં (સી.)] એવરૂપં પાપકમ્મં [પાપં કમ્મં (સી. પી.)] ન કરેય્યં [ન કરેય્ય (સી.) દી. નિ. ૧.૧૮૩ પાળિયા તદટ્ઠકથાય ચ સંસન્દેતબ્બં] ગારય્હં સીસચ્છેજ્જ’ન્તિ. એવમેવં ખો, ભિક્ખવે, યસ્સ કસ્સચિ ભિક્ખુસ્સ વા ભિક્ખુનિયા વા એવં તિબ્બા ભયસઞ્ઞા પચ્ચુપટ્ઠિતા હોતિ પારાજિકેસુ ધમ્મેસુ. તસ્સેતં પાટિકઙ્ખં – અનાપન્નો વા પારાજિકં ધમ્મં ન આપજ્જિસ્સતિ, આપન્નો વા પારાજિકં ધમ્મં યથાધમ્મં પટિકરિસ્સતિ.

‘‘સેય્યથાપિ, ભિક્ખવે, પુરિસો કાળવત્થં [કાળકં વત્થં (સી. સ્યા. કં. પી.)] પરિધાય કેસે પકિરિત્વા મુસલં ખન્ધે આરોપેત્વા મહાજનકાયં ઉપસઙ્કમિત્વા એવં વદેય્ય – ‘અહં, ભન્તે, પાપકમ્મં અકાસિં ગારય્હં મોસલ્લં, યેન મે આયસ્મન્તો અત્તમના હોન્તિ તં કરોમી’તિ. તત્રઞ્ઞતરસ્સ થલટ્ઠસ્સ પુરિસસ્સ એવમસ્સ – ‘પાપકં વત, ભો, અયં પુરિસો કમ્મં અકાસિ ગારય્હં મોસલ્લં. યત્ર હિ નામ કાળવત્થં પરિધાય કેસે પકિરિત્વા મુસલં ખન્ધે આરોપેત્વા મહાજનકાયં ઉપસઙ્કમિત્વા એવં વક્ખતિ – ‘અહં, ભન્તે, પાપકમ્મં અકાસિં ગારય્હં મોસલ્લં, યેન મે આયસ્મન્તો અત્તમના હોન્તિ તં કરોમીતિ. સો વતસ્સાહં એવરૂપં પાપકમ્મં ન કરેય્યં ગારય્હં મોસલ્લ’ન્તિ. એવમેવં ખો, ભિક્ખવે, યસ્સ કસ્સચિ ભિક્ખુસ્સ વા ભિક્ખુનિયા વા એવં તિબ્બા ભયસઞ્ઞા પચ્ચુપટ્ઠિતા હોતિ સઙ્ઘાદિસેસેસુ ધમ્મેસુ, તસ્સેતં પાટિકઙ્ખં – અનાપન્નો વા સઙ્ઘાદિસેસં ધમ્મં ન આપજ્જિસ્સતિ, આપન્નો વા સઙ્ઘાદિસેસં ધમ્મં યથાધમ્મં પટિકરિસ્સતિ.

‘‘સેય્યથાપિ, ભિક્ખવે, પુરિસો કાળવત્થં પરિધાય કેસે પકિરિત્વા ભસ્મપુટં [અસ્સપુટં (સી. સ્યા. કં. પી.)] ખન્ધે આરોપેત્વા મહાજનકાયં ઉપસઙ્કમિત્વા એવં વદેય્ય – ‘અહં, ભન્તે, પાપકમ્મં અકાસિં ગારય્હં ભસ્મપુટં. યેન મે આયસ્મન્તો અત્તમના હોન્તિ તં કરોમી’તિ. તત્રઞ્ઞતરસ્સ થલટ્ઠસ્સ પુરિસસ્સ એવમસ્સ – ‘પાપકં વત, ભો, અયં પુરિસો કમ્મં અકાસિ ગારય્હં ભસ્મપુટં. યત્ર હિ નામ કાળવત્થં પરિધાય કેસે પકિરિત્વા ભસ્મપુટં ખન્ધે આરોપેત્વા મહાજનકાયં ઉપસઙ્કમિત્વા એવં વક્ખતિ – અહં, ભન્તે, પાપકમ્મં અકાસિં ગારય્હં ભસ્મપુટં; યેન મે આયસ્મન્તો અત્તમના હોન્તિ તં કરોમીતિ. સો વતસ્સાહં એવરૂપં પાપકમ્મં ન કરેય્યં ગારય્હં ભસ્મપુટ’ન્તિ. એવમેવં ખો, ભિક્ખવે, યસ્સ કસ્સચિ ભિક્ખુસ્સ વા ભિક્ખુનિયા વા એવં તિબ્બા ભયસઞ્ઞા પચ્ચુપટ્ઠિતા હોતિ પાચિત્તિયેસુ ધમ્મેસુ, તસ્સેતં પાટિકઙ્ખં – અનાપન્નો વા પાચિત્તિયં ધમ્મં ન આપજ્જિસ્સતિ, આપન્નો વા પાચિત્તિયં ધમ્મં યથાધમ્મં પટિકરિસ્સતિ.

‘‘સેય્યથાપિ, ભિક્ખવે, પુરિસો કાળવત્થં પરિધાય કેસે પકિરિત્વા મહાજનકાયં ઉપસઙ્કમિત્વા એવં વદેય્ય – ‘અહં, ભન્તે, પાપકમ્મં અકાસિં ગારય્હં ઉપવજ્જં. યેન મે આયસ્મન્તો અત્તમના હોન્તિ તં કરોમી’તિ. તત્રઞ્ઞતરસ્સ થલટ્ઠસ્સ પુરિસસ્સ એવમસ્સ – ‘પાપકં વત, ભો, અયં પુરિસો કમ્મં અકાસિ ગારય્હં ઉપવજ્જં. યત્ર હિ નામ કાળવત્થં પરિધાય કેસે પકિરિત્વા મહાજનકાયં ઉપસઙ્કમિત્વા એવં વક્ખતિ – અહં, ભન્તે, પાપકમ્મં અકાસિં ગારય્હં ઉપવજ્જં; યેન મે આયસ્મન્તો અત્તમના હોન્તિ તં કરોમીતિ. સો વતસ્સાહં એવરૂપં પાપકમ્મં ન કરેય્યં ગારય્હં ઉપવજ્જ’ન્તિ. એવમેવં ખો, ભિક્ખવે, યસ્સ કસ્સચિ ભિક્ખુસ્સ વા ભિક્ખુનિયા વા એવં તિબ્બા ભયસઞ્ઞા પચ્ચુપટ્ઠિતા હોતિ પાટિદેસનીયેસુ ધમ્મેસુ, તસ્સેતં પાટિકઙ્ખં – અનાપન્નો વા પાટિદેસનીયં ધમ્મં ન આપજ્જિસ્સતિ, આપન્નો વા પાટિદેસનીયં ધમ્મં યથાધમ્મં પટિકરિસ્સતિ. ઇમાનિ ખો, ભિક્ખવે, ચત્તારિ આપત્તિભયાની’’તિ. દુતિયં.

૩. સિક્ખાનિસંસસુત્તં

૨૪૫. ‘‘સિક્ખાનિસંસમિદં, ભિક્ખવે, બ્રહ્મચરિયં વુસ્સતિ પઞ્ઞુત્તરં વિમુત્તિસારં સતાધિપતેય્યં. કથઞ્ચ, ભિક્ખવે, સિક્ખાનિસંસં હોતિ? ઇધ, ભિક્ખવે, મયા સાવકાનં આભિસમાચારિકા સિક્ખા પઞ્ઞત્તા અપ્પસન્નાનં પસાદાય પસન્નાનં ભિય્યોભાવાય. યથા યથા, ભિક્ખવે, મયા સાવકાનં આભિસમાચારિકા સિક્ખા પઞ્ઞત્તા અપ્પસન્નાનં પસાદાય પસન્નાનં ભિય્યોભાવાય તથા તથા સો તસ્સા સિક્ખાય અખણ્ડકારી હોતિ અચ્છિદ્દકારી અસબલકારી અકમ્માસકારી, સમાદાય સિક્ખતિ સિક્ખાપદેસુ.

‘‘પુન ચપરં, ભિક્ખવે, મયા સાવકાનં આદિબ્રહ્મચરિયિકા સિક્ખા પઞ્ઞત્તા સબ્બસો સમ્મા દુક્ખક્ખયાય. યથા યથા, ભિક્ખવે, મયા સાવકાનં આદિબ્રહ્મચરિયિકા સિક્ખા પઞ્ઞત્તા સબ્બસો સમ્મા દુક્ખક્ખયાય તથા તથા સો તસ્સા સિક્ખાય અખણ્ડકારી હોતિ અચ્છિદ્દકારી અસબલકારી અકમ્માસકારી, સમાદાય સિક્ખતિ સિક્ખાપદેસુ. એવં ખો, ભિક્ખવે, સિક્ખાનિસંસં હોતિ.

‘‘કથઞ્ચ, ભિક્ખવે, પઞ્ઞુત્તરં હોતિ? ઇધ, ભિક્ખવે, મયા સાવકાનં ધમ્મા દેસિતા સબ્બસો સમ્મા દુક્ખક્ખયાય. યથા યથા, ભિક્ખવે, મયા સાવકાનં ધમ્મા દેસિતા સબ્બસો સમ્મા દુક્ખક્ખયાય તથા તથાસ્સ તે ધમ્મા પઞ્ઞાય સમવેક્ખિતા હોન્તિ. એવં ખો, ભિક્ખવે, પઞ્ઞુત્તરં હોતિ.

‘‘કથઞ્ચ, ભિક્ખવે, વિમુત્તિસારં હોતિ? ઇધ, ભિક્ખવે, મયા સાવકાનં ધમ્મા દેસિતા સબ્બસો સમ્મા દુક્ખક્ખયાય. યથા યથા, ભિક્ખવે, મયા સાવકાનં ધમ્મા દેસિતા સબ્બસો સમ્મા દુક્ખક્ખયાય તથા તથાસ્સ તે ધમ્મા વિમુત્તિયા ફુસિતા હોન્તિ. એવં ખો, ભિક્ખવે, વિમુત્તિસારં હોતિ.

‘‘કથઞ્ચ, ભિક્ખવે, સતાધિપતેય્યં હોતિ? ‘ઇતિ અપરિપૂરં વા આભિસમાચારિકં સિક્ખં પરિપૂરેસ્સામિ, પરિપૂરં વા આભિસમાચારિકં સિક્ખં તત્થ તત્થ પઞ્ઞાય અનુગ્ગહેસ્સામી’તિ – અજ્ઝત્તંયેવ સતિ સૂપટ્ઠિતા હોતિ. ‘ઇતિ અપરિપૂરં વા આદિબ્રહ્મચરિયિકં સિક્ખં પરિપૂરેસ્સામિ, પરિપૂરં વા આદિબ્રહ્મચરિયિકં સિક્ખં તત્થ તત્થ પઞ્ઞાય અનુગ્ગહેસ્સામી’તિ – અજ્ઝત્તંયેવ સતિ સૂપટ્ઠિતા હોતિ. ‘ઇતિ અસમવેક્ખિતં વા ધમ્મં પઞ્ઞાય સમવેક્ખિસ્સામિ, સમવેક્ખિતં વા ધમ્મં તત્થ તત્થ પઞ્ઞાય અનુગ્ગહેસ્સામી’તિ – અજ્ઝત્તંયેવ સતિ સૂપટ્ઠિતા હોતિ. ‘ઇતિ અફુસિતં વા ધમ્મં વિમુત્તિયા ફુસિસ્સામિ, ફુસિતં વા ધમ્મં તત્થ તત્થ પઞ્ઞાય અનુગ્ગહેસ્સામી’તિ – અજ્ઝત્તંયેવ સતિ સૂપટ્ઠિતા હોતિ. એવં ખો, ભિક્ખવે, સતાધિપતેય્યં હોતિ. ‘સિક્ખાનિસંસમિદં, ભિક્ખવે, બ્રહ્મચરિયં વુસ્સતિ પઞ્ઞુત્તરં વિમુત્તિસારં સતાધિપતેય્ય’ન્તિ, ઇતિ યં તં વુત્તં ઇદમેતં પટિચ્ચ વુત્ત’’ન્તિ. તતિયં.

૪. સેય્યાસુત્તં

૨૪૬. ‘‘ચતસ્સો ઇમા, ભિક્ખવે, સેય્યા. કતમા ચતસ્સો? પેતસેય્યા, કામભોગિસેય્યા, સીહસેય્યા, તથાગતસેય્યા. કતમા ચ, ભિક્ખવે, પેતસેય્યા? યેભુય્યેન, ભિક્ખવે, પેતા ઉત્તાના સેન્તિ; અયં વુચ્ચતિ, ભિક્ખવે, પેતસેય્યા.

‘‘કતમા ચ, ભિક્ખવે, કામભોગિસેય્યા? યેભુય્યેન, ભિક્ખવે, કામભોગી વામેન પસ્સેન સેન્તિ; અયં વુચ્ચતિ, ભિક્ખવે, કામભોગિસેય્યા.

‘‘કતમા ચ, ભિક્ખવે, સીહસેય્યા? સીહો, ભિક્ખવે, મિગરાજા દક્ખિણેન પસ્સેન સેય્યં કપ્પેતિ, પાદે પાદં અચ્ચાધાય, અન્તરસત્થિમ્હિ નઙ્ગુટ્ઠં અનુપક્ખિપિત્વા. સો પટિબુજ્ઝિત્વા પુરિમં કાયં અબ્ભુન્નામેત્વા પચ્છિમં કાયં અનુવિલોકેતિ. સચે, ભિક્ખવે, સીહો મિગરાજા કિઞ્ચિ પસ્સતિ કાયસ્સ વિક્ખિત્તં વા વિસટં વા, તેન, ભિક્ખવે, સીહો મિગરાજા અનત્તમનો હોતિ. સચે પન, ભિક્ખવે, સીહો મિગરાજા ન કિઞ્ચિ પસ્સતિ કાયસ્સ વિક્ખિત્તં વા વિસટં વા, તેન, ભિક્ખવે, સીહો મિગરાજા અત્તમનો હોતિ. અયં વુચ્ચતિ, ભિક્ખવે, સીહસેય્યા.

‘‘કતમા ચ, ભિક્ખવે, તથાગતસેય્યા? ઇધ, ભિક્ખવે, તથાગતો વિવિચ્ચેવ કામેહિ…પે… ચતુત્થં ઝાનં ઉપસમ્પજ્જ વિહરતિ. અયં વુચ્ચતિ, ભિક્ખવે, તથાગતસેય્યા. ઇમા ખો, ભિક્ખવે, ચતસ્સો સેય્યા’’તિ. ચતુત્થં.

૫. થૂપારહસુત્તં

૨૪૭. ‘‘ચત્તારોમે, ભિક્ખવે, થૂપારહા. કતમે ચત્તારો? તથાગતો અરહં સમ્માસમ્બુદ્ધો થૂપારહો, પચ્ચેકબુદ્ધો થૂપારહો, તથાગતસાવકો થૂપારહો, રાજા ચક્કવત્તી થૂપારહો – ઇમે ખો, ભિક્ખવે, ચત્તારો થૂપારહા’’તિ. પઞ્ચમં.

૬. પઞ્ઞાવુદ્ધિસુત્તં

૨૪૮. ‘‘ચત્તારોમે, ભિક્ખવે, ધમ્મા પઞ્ઞાવુદ્ધિયા સંવત્તન્તિ. કતમે ચત્તારો? સપ્પુરિસસંસેવો, સદ્ધમ્મસવનં, યોનિસોમનસિકારો, ધમ્માનુધમ્મપ્પટિપત્તિ – ઇમે ખો, ભિક્ખવે, ચત્તારો ધમ્મા પઞ્ઞાવુદ્ધિયા સંવત્તન્તી’’તિ. છટ્ઠં.

૭. બહુકારસુત્તં

૨૪૯. ‘‘ચત્તારોમે, ભિક્ખવે, ધમ્મા મનુસ્સભૂતસ્સ બહુકારા હોન્તિ. કતમે ચત્તારો? સપ્પુરિસસંસેવો, સદ્ધમ્મસવનં, યોનિસોમનસિકારો, ધમ્માનુધમ્મપ્પટિપત્તિ – ઇમે ખો, ભિક્ખવે, ચત્તારો ધમ્મા મનુસ્સભૂતસ્સ બહુકારા હોન્તી’’તિ. સત્તમં.

૮. પઠમવોહારસુત્તં

૨૫૦. ‘‘ચત્તારોમે, ભિક્ખવે, અનરિયવોહારા. કતમે ચત્તારો? અદિટ્ઠે દિટ્ઠવાદિતા, અસુતે સુતવાદિતા, અમુતે મુતવાદિતા, અવિઞ્ઞાતે વિઞ્ઞાતવાદિતા – ઇમે ખો, ભિક્ખવે, ચત્તારો અનરિયવોહારા’’તિ. અટ્ઠમં.

૯. દુતિયવોહારસુત્તં

૨૫૧. ‘‘ચત્તારોમે, ભિક્ખવે, અરિયવોહારા. કતમે ચત્તારો? અદિટ્ઠે અદિટ્ઠવાદિતા, અસુતે અસુતવાદિતા, અમુતે અમુતવાદિતા, અવિઞ્ઞાતે અવિઞ્ઞાતવાદિતા – ઇમે ખો, ભિક્ખવે, ચત્તારો અરિયવોહારા’’તિ. નવમં.

૧૦. તતિયવોહારસુત્તં

૨૫૨. ‘‘ચત્તારોમે, ભિક્ખવે, અનરિયવોહારા. કતમે ચત્તારો? દિટ્ઠે અદિટ્ઠવાદિતા, સુતે અસુતવાદિતા, મુતે અમુતવાદિતા, વિઞ્ઞાતે અવિઞ્ઞાતવાદિતા – ઇમે ખો, ભિક્ખવે, ચત્તારો અનરિયવોહારા’’તિ. દસમં.

૧૧. ચતુત્થવોહારસુત્તં

૨૫૩. ‘‘ચત્તારોમે, ભિક્ખવે, અરિયવોહારા. કતમે ચત્તારો? દિટ્ઠે દિટ્ઠવાદિતા, સુતે સુતવાદિતા, મુતે મુતવાદિતા, વિઞ્ઞાતે વિઞ્ઞાતવાદિતા – ઇમે ખો, ભિક્ખવે, ચત્તારો અરિયવોહારા’’તિ. એકાદસમં.

આપત્તિભયવગ્ગો પઞ્ચમો.