(૧૫) ૫. આભાવગ્ગો

૧. આભાસુત્તં

૧૪૧. ‘‘ચતસ્સો ઇમા, ભિક્ખવે, આભા. કતમા ચતસ્સો? ચન્દાભા, સૂરિયાભા, અગ્ગાભા, પઞ્ઞાભા – ઇમા ખો, ભિક્ખવે, ચતસ્સો આભા. એતદગ્ગં, ભિક્ખવે, ઇમાસં ચતુન્નં [ચતસ્સન્નં (સ્યા. કં.) સદ્દનીતિપદમાલા પસ્સિતબ્બા] આભાનં યદિદં પઞ્ઞાભા’’તિ. પઠમં.

૨. પભાસુત્તં

૧૪૨. ‘‘ચતસ્સો ઇમા, ભિક્ખવે, પભા. કતમા ચતસ્સો? ચન્દપ્પભા, સૂરિયપ્પભા, અગ્ગિપ્પભા, પઞ્ઞાપભા – ઇમા ખો, ભિક્ખવે, ચતસ્સો પભા. એતદગ્ગં, ભિક્ખવે, ઇમાસં ચતુન્નં પભાનં યદિદં પઞ્ઞાપભા’’તિ. દુતિયં.

૩. આલોકસુત્તં

૧૪૩. ‘‘ચત્તારોમે, ભિક્ખવે, આલોકા. કતમે ચત્તારો? ચન્દાલોકો, સૂરિયાલોકો, અગ્ગાલોકો, પઞ્ઞાલોકો – ઇમે ખો, ભિક્ખવે, ચત્તારો આલોકા. એતદગ્ગં, ભિક્ખવે, ઇમેસં ચતુન્નં આલોકાનં યદિદં પઞ્ઞાલોકો’’તિ. તતિયં.

૪. ઓભાસસુત્તં

૧૪૪. ‘‘ચત્તારોમે, ભિક્ખવે, ઓભાસા. કતમે ચત્તારો? ચન્દોભાસો, સૂરિયોભાસો, અગ્ગોભાસો, પઞ્ઞોભાસો – ઇમે ખો, ભિક્ખવે, ચત્તારો ઓભાસા. એતદગ્ગં, ભિક્ખવે, ઇમેસં ચતુન્નં ઓભાસાનં યદિદં પઞ્ઞોભાસો’’તિ. ચતુત્થં.

૫. પજ્જોતસુત્તં

૧૪૫. ‘‘ચત્તારોમે, ભિક્ખવે, પજ્જોતા. કતમે ચત્તારો? ચન્દપજ્જોતો, સૂરિયપજ્જોતો, અગ્ગિપજ્જોતો, પઞ્ઞાપજ્જોતો – ઇમે ખો, ભિક્ખવે, ચત્તારો પજ્જોતા. એતદગ્ગં, ભિક્ખવે, ઇમેસં ચતુન્નં પજ્જોતાનં યદિદં પઞ્ઞાપજ્જોતો’’તિ. પઞ્ચમં.

૬. પઠમકાલસુત્તં

૧૪૬. ‘‘ચત્તારોમે, ભિક્ખવે, કાલા. કતમે ચત્તારો? કાલેન ધમ્મસ્સવનં, કાલેન ધમ્મસાકચ્છા, કાલેન સમ્મસના [કાલેન સમથો (સી. સ્યા. કં. પી.)], કાલેન વિપસ્સના – ઇમે ખો, ભિક્ખવે, ચત્તારો કાલા’’તિ. છટ્ઠં.

૭. દુતિયકાલસુત્તં

૧૪૭. ‘‘ચત્તારોમે, ભિક્ખવે, કાલા સમ્મા ભાવિયમાના સમ્મા અનુપરિવત્તિયમાના અનુપુબ્બેન આસવાનં ખયં પાપેન્તિ. કતમે ચત્તારો? કાલેન ધમ્મસ્સવનં, કાલેન ધમ્મસાકચ્છા, કાલેન સમ્મસના, કાલેન વિપસ્સના – ઇમે ખો, ભિક્ખવે, ચત્તારો કાલા સમ્મા ભાવિયમાના સમ્મા અનુપરિવત્તિયમાના અનુપુબ્બેન આસવાનં ખયં પાપેન્તિ.

‘‘સેય્યથાપિ, ભિક્ખવે, ઉપરિપબ્બતે થુલ્લફુસિતકે દેવે વસ્સન્તે તં ઉદકં યથાનિન્નં પવત્તમાનં પબ્બતકન્દરપદરસાખા પરિપૂરેતિ; પબ્બતકન્દરપદરસાખા પરિપૂરા કુસોબ્ભે પરિપૂરેન્તિ; કુસોબ્ભા પરિપૂરા મહાસોબ્ભે પરિપૂરેન્તિ; મહાસોબ્ભા પરિપૂરા કુન્નદિયો પરિપૂરેન્તિ; કુન્નદિયો પરિપૂરા મહાનદિયો પરિપૂરેન્તિ; મહાનદિયો પરિપૂરા સમુદ્દં [સમુદ્દં સાગરં (સી. પી. ક.), સમુદ્દસાગરં (સ્યા. કં.)] પરિપૂરેન્તિ. એવમેવં ખો, ભિક્ખવે, ઇમે ચત્તારો કાલા સમ્મા ભાવિયમાના સમ્મા અનુપરિવત્તિયમાના અનુપુબ્બેન આસવાનં ખયં પાપેન્તી’’તિ. સત્તમં.

૮. દુચ્ચરિતસુત્તં

૧૪૮. ‘‘ચત્તારિમાનિ, ભિક્ખવે, વચીદુચ્ચરિતાનિ. કતમાનિ ચત્તારિ? મુસાવાદો, પિસુણા વાચા, ફરુસા વાચા, સમ્ફપ્પલાપો – ઇમાનિ ખો, ભિક્ખવે, ચત્તારિ વચીદુચ્ચરિતાની’’તિ. અટ્ઠમં.

૯. સુચરિતસુત્તં

૧૪૯. ‘‘ચત્તારિમાનિ, ભિક્ખવે, વચીસુચરિતાનિ. કતમાનિ ચત્તારિ? સચ્ચવાચા, અપિસુણા વાચા, સણ્હા વાચા, મન્તભાસા – ઇમાનિ ખો, ભિક્ખવે, ચત્તારિ વચીસુચરિતાની’’તિ. નવમં.

૧૦. સારસુત્તં

૧૫૦. ‘‘ચત્તારોમે, ભિક્ખવે, સારા. કતમે ચત્તારો? સીલસારો, સમાધિસારો, પઞ્ઞાસારો, વિમુત્તિસારો – ઇમે ખો, ભિક્ખવે, ચત્તારો સારા’’તિ. દસમં.

આભાવગ્ગો પઞ્ચમો.