૯. ધમ્મકથિકસુત્તં

૧૩૯. ‘‘ચત્તારોમે, ભિક્ખવે, ધમ્મકથિકા. કતમે ચત્તારો? ઇધ, ભિક્ખવે, એકચ્ચો ધમ્મકથિકો અપ્પઞ્ચ ભાસતિ અસહિતઞ્ચ; પરિસા ચસ્સ [પરિસા ચ (સી. સ્યા. કં. પી.) પુ. પ. ૧૫૬] ન કુસલા હોતિ સહિતાસહિતસ્સ. એવરૂપો, ભિક્ખવે, ધમ્મકથિકો એવરૂપાય પરિસાય ધમ્મકથિકોત્વેવ સઙ્ખં ગચ્છતિ.

‘‘ઇધ પન, ભિક્ખવે, એકચ્ચો ધમ્મકથિકો અપ્પઞ્ચ ભાસતિ સહિતઞ્ચ; પરિસા ચસ્સ કુસલા હોતિ સહિતાસહિતસ્સ. એવરૂપો, ભિક્ખવે, ધમ્મકથિકો એવરૂપાય પરિસાય ધમ્મકથિકોત્વેવ સઙ્ખં ગચ્છતિ.

‘‘ઇધ પન, ભિક્ખવે, એકચ્ચો ધમ્મકથિકો બહુઞ્ચ ભાસતિ અસહિતઞ્ચ; પરિસા ચસ્સ ન કુસલા હોતિ સહિતાસહિતસ્સ. એવરૂપો, ભિક્ખવે, ધમ્મકથિકો એવરૂપાય પરિસાય ધમ્મકથિકોત્વેવ સઙ્ખં ગચ્છતિ.

‘‘ઇધ પન, ભિક્ખવે, એકચ્ચો ધમ્મકથિકો બહુઞ્ચ ભાસતિ સહિતઞ્ચ; પરિસા ચસ્સ કુસલા હોતિ સહિતાસહિતસ્સ. એવરૂપો, ભિક્ખવે, ધમ્મકથિકો એવરૂપાય પરિસાય ધમ્મકથિકોત્વેવ સઙ્ખં ગચ્છતિ. ઇમે ખો, ભિક્ખવે, ચત્તારો ધમ્મકથિકા’’તિ. નવમં.