(૧૮) ૩. સાધુવગ્ગો

૧. સાધુસુત્તં

૧૭૮. [અ. નિ. ૧૦.૧૩૪] ‘‘સાધુઞ્ચ વો, ભિક્ખવે, દેસેસ્સામિ અસાધુઞ્ચ. તં સુણાથ, સાધુકં મનસિ કરોથ; ભાસિસ્સામી’’તિ. ‘‘એવં, ભન્તે’’તિ ખો તે ભિક્ખૂ ભગવતો પચ્ચસ્સોસું. ભગવા એતદવોચ –

‘‘કતમઞ્ચ, ભિક્ખવે, અસાધુ? પાણાતિપાતો, અદિન્નાદાનં, કામેસુમિચ્છાચારો, મુસાવાદો, પિસુણા વાચા, ફરુસા વાચા, સમ્ફપ્પલાપો, અભિજ્ઝા, બ્યાપાદો, મિચ્છાદિટ્ઠિ – ઇદં વુચ્ચતિ, ભિક્ખવે, અસાધુ.

‘‘કતમઞ્ચ, ભિક્ખવે, સાધુ? પાણાતિપાતા વેરમણી, અદિન્નાદાના વેરમણી, કામેસુમિચ્છાચારા વેરમણી, મુસાવાદા વેરમણી, પિસુણાય વાચાય વેરમણી, ફરુસાય વાચાય વેરમણી, સમ્ફપ્પલાપા વેરમણી, અનભિજ્ઝા, અબ્યાપાદો, સમ્માદિટ્ઠિ – ઇદં વુચ્ચતિ, ભિક્ખવે, સાધૂ’’તિ. પઠમં.

૨. અરિયધમ્મસુત્તં

૧૭૯. ‘‘અરિયધમ્મઞ્ચ વો, ભિક્ખવે, દેસેસ્સામિ અનરિયધમ્મઞ્ચ. તં સુણાથ…પે… કતમો ચ, ભિક્ખવે, અનરિયો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, અનરિયો ધમ્મો.

‘‘કતમો ચ, ભિક્ખવે, અરિયો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અરિયો ધમ્મો’’તિ. દુતિયં.

૩. કુસલસુત્તં

૧૮૦. ‘‘કુસલઞ્ચ વો, ભિક્ખવે, દેસેસ્સામિ અકુસલઞ્ચ. તં સુણાથ…પે… કતમઞ્ચ, ભિક્ખવે, અકુસલં? પાણાતિપાતો…પે… મિચ્છાદિટ્ઠિ – ઇદં વુચ્ચતિ, ભિક્ખવે, અકુસલં.

‘‘કતમઞ્ચ, ભિક્ખવે, કુસલં? પાણાતિપાતા વેરમણી…પે… સમ્માદિટ્ઠિ – ઇદં વુચ્ચતિ, ભિક્ખવે, કુસલ’’ન્તિ. તતિયં.

૪. અત્થસુત્તં

૧૮૧. ‘‘અત્થઞ્ચ વો, ભિક્ખવે, દેસેસ્સામિ અનત્થઞ્ચ. તં સુણાથ…પે… કતમો ચ, ભિક્ખવે, અનત્થો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, અનત્થો.

‘‘કતમો ચ, ભિક્ખવે, અત્થો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અત્થો’’તિ. ચતુત્થં.

૫. ધમ્મસુત્તં

૧૮૨. ‘‘ધમ્મઞ્ચ વો, ભિક્ખવે, દેસેસ્સામિ અધમ્મઞ્ચ. તં સુણાથ…પે… કતમો ચ, ભિક્ખવે, અધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, અધમ્મો.

‘‘કતમો ચ, ભિક્ખવે, ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, ધમ્મો’’તિ. પઞ્ચમં.

૬. આસવસુત્તં

૧૮૩. ‘‘સાસવઞ્ચ વો, ભિક્ખવે, ધમ્મં દેસેસ્સામિ અનાસવઞ્ચ. તં સુણાથ…પે… કતમો ચ, ભિક્ખવે, સાસવો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, સાસવો ધમ્મો.

‘‘કતમો ચ, ભિક્ખવે, અનાસવો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અનાસવો ધમ્મો’’તિ. છટ્ઠં.

૭. વજ્જસુત્તં

૧૮૪. ‘‘સાવજ્જઞ્ચ વો, ભિક્ખવે, ધમ્મં દેસેસ્સામિ અનવજ્જઞ્ચ. તં સુણાથ…પે… કતમો ચ, ભિક્ખવે, સાવજ્જો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, સાવજ્જો ધમ્મો.

‘‘કતમો ચ, ભિક્ખવે, અનવજ્જો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અનવજ્જો ધમ્મો’’તિ. સત્તમં.

૮. તપનીયસુત્તં

૧૮૫. ‘‘તપનીયઞ્ચ વો, ભિક્ખવે, ધમ્મં દેસેસ્સામિ અતપનીયઞ્ચ. તં સુણાથ…પે… કતમો ચ, ભિક્ખવે, તપનીયો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, તપનીયો ધમ્મો.

‘‘કતમો ચ, ભિક્ખવે, અતપનીયો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અતપનીયો ધમ્મો’’તિ. અટ્ઠમં.

૯. આચયગામિસુત્તં

૧૮૬. ‘‘આચયગામિઞ્ચ વો, ભિક્ખવે, ધમ્મં દેસેસ્સામિ અપચયગામિઞ્ચ. તં સુણાથ…પે… કતમો ચ, ભિક્ખવે, આચયગામી ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, આચયગામી ધમ્મો.

‘‘કતમો ચ, ભિક્ખવે, અપચયગામી ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, અપચયગામી ધમ્મો’’તિ. નવમં.

૧૦. દુક્ખુદ્રયસુત્તં

૧૮૭. ‘‘દુક્ખુદ્રયઞ્ચ વો, ભિક્ખવે, ધમ્મં દેસેસ્સામિ સુખુદ્રયઞ્ચ. તં સુણાથ…પે… કતમો ચ, ભિક્ખવે, દુક્ખુદ્રયો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, દુક્ખુદ્રયો ધમ્મો.

‘‘કતમો ચ, ભિક્ખવે, સુખુદ્રયો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, સુખુદ્રયો ધમ્મો’’તિ. દસમં.

૧૧. વિપાકસુત્તં

૧૮૮. ‘‘દુક્ખવિપાકઞ્ચ વો, ભિક્ખવે, ધમ્મં દેસેસ્સામિ સુખવિપાકઞ્ચ. તં સુણાથ…પે… કતમો ચ, ભિક્ખવે, દુક્ખવિપાકો ધમ્મો? પાણાતિપાતો…પે… મિચ્છાદિટ્ઠિ – અયં વુચ્ચતિ, ભિક્ખવે, દુક્ખવિપાકો ધમ્મો.

‘‘કતમો ચ, ભિક્ખવે, સુખવિપાકો ધમ્મો? પાણાતિપાતા વેરમણી…પે… સમ્માદિટ્ઠિ – અયં વુચ્ચતિ, ભિક્ખવે, સુખવિપાકો ધમ્મો’’તિ. એકાદસમં.

સાધુવગ્ગો તતિયો.