૯. પરિક્કમનસુત્તં

૧૭૫. ‘‘સપરિક્કમનો અયં, ભિક્ખવે, ધમ્મો, નાયં ધમ્મો અપરિક્કમનો. કથઞ્ચ, ભિક્ખવે, સપરિક્કમનો અયં ધમ્મો, નાયં ધમ્મો અપરિક્કમનો? પાણાતિપાતિસ્સ, ભિક્ખવે, પાણાતિપાતા વેરમણી પરિક્કમનં હોતિ. અદિન્નાદાયિસ્સ, ભિક્ખવે, અદિન્નાદાના વેરમણી પરિક્કમનં હોતિ. કામેસુમિચ્છાચારિસ્સ, ભિક્ખવે, કામેસુમિચ્છાચારા વેરમણી પરિક્કમનં હોતિ. મુસાવાદિસ્સ, ભિક્ખવે, મુસાવાદા વેરમણી પરિક્કમનં હોતિ. પિસુણવાચસ્સ, ભિક્ખવે, પિસુણાય વાચાય વેરમણી પરિક્કમનં હોતિ. ફરુસવાચસ્સ, ભિક્ખવે, ફરુસાય વાચાય વેરમણી પરિક્કમનં હોતિ. સમ્ફપ્પલાપિસ્સ, ભિક્ખવે, સમ્ફપ્પલાપા વેરમણી પરિક્કમનં હોતિ. અભિજ્ઝાલુસ્સ, ભિક્ખવે, અનભિજ્ઝા પરિક્કમનં હોતિ. બ્યાપન્નચિત્તસ્સ [બ્યાપાદસ્સ (સી. પી. ક.), બ્યાપન્નસ્સ (સ્યા.)], ભિક્ખવે, અબ્યાપાદો પરિક્કમનં હોતિ. મિચ્છાદિટ્ઠિસ્સ, ભિક્ખવે, સમ્માદિટ્ઠિ પરિક્કમનં હોતિ. એવં ખો, ભિક્ખવે, સપરિક્કમનો અયં ધમ્મો, નાયં ધમ્મો અપરિક્કમનો’’તિ. નવમં.