૧. વાહનસુત્તં

૮૧. એકં સમયં ભગવા ચમ્પાયં વિહરતિ ગગ્ગરાય પોક્ખરણિયા તીરે. અથ ખો આયસ્મા વાહનો યેન ભગવા તેનુપસઙ્કમિ; ઉપસઙ્કમિત્વા ભગવન્તં અભિવાદેત્વા એકમન્તં નિસીદિ. એકમન્તં નિસિન્નો ખો આયસ્મા વાહનો ભગવન્તં એતદવોચ – ‘‘કતિહિ નુ ખો, ભન્તે, ધમ્મેહિ તથાગતો નિસ્સટો વિસંયુત્તો વિપ્પમુત્તો વિમરિયાદીકતેન ચેતસા વિહરતી’’તિ?

‘‘દસહિ ખો, વાહન, ધમ્મેહિ તથાગતો નિસ્સટો વિસંયુત્તો વિપ્પમુત્તો વિમરિયાદીકતેન ચેતસા વિહરતિ. કતમેહિ દસહિ? રૂપેન ખો, વાહન, તથાગતો નિસ્સટો વિસંયુત્તો વિપ્પમુત્તો વિમરિયાદીકતેન ચેતસા વિહરતિ, વેદનાય ખો, વાહન…પે… સઞ્ઞાય ખો, વાહન… સઙ્ખારેહિ ખો, વાહન… વિઞ્ઞાણેન ખો, વાહન… જાતિયા ખો, વાહન… જરાય ખો, વાહન… મરણેન ખો, વાહન… દુક્ખેહિ ખો, વાહન… કિલેસેહિ ખો, વાહન, તથાગતો નિસ્સટો વિસંયુત્તો વિપ્પમુત્તો વિમરિયાદીકતેન ચેતસા વિહરતિ. સેય્યથાપિ, વાહન, ઉપ્પલં વા પદુમં વા પુણ્ડરીકં વા ઉદકે જાતં ઉદકે સંવડ્ઢં ઉદકા પચ્ચુગ્ગમ્મ ઠિતં અનુપલિત્તં ઉદકેન; એવમેવં ખો, વાહન, ઇમેહિ દસહિ ધમ્મેહિ તથાગતો નિસ્સટો વિસંયુત્તો વિપ્પમુત્તો વિમરિયાદીકતેન ચેતસા વિહરતી’’તિ. પઠમં.