૩. તતિયવગ્ગો

૩૦૮. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ બહુજનઅહિતાય બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાનં. કતમો એકપુગ્ગલો? મિચ્છાદિટ્ઠિકો હોતિ વિપરીતદસ્સનો. સો બહુજનં સદ્ધમ્મા વુટ્ઠાપેત્વા અસદ્ધમ્મે પતિટ્ઠાપેતિ. અયં ખો, ભિક્ખવે, એકપુગ્ગલો લોકે ઉપ્પજ્જમાનો ઉપ્પજ્જતિ બહુજનઅહિતાય બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાન’’ન્તિ.

૩૦૯. ‘‘એકપુગ્ગલો, ભિક્ખવે, લોકે ઉપ્પજ્જમાનો ઉપ્પજ્જતિ બહુજનહિતાય બહુજનસુખાય, બહુનો જનસ્સ અત્થાય હિતાય સુખાય દેવમનુસ્સાનં. કતમો એકપુગ્ગલો? સમ્માદિટ્ઠિકો હોતિ અવિપરીતદસ્સનો. સો બહુજનં અસદ્ધમ્મા વુટ્ઠાપેત્વા સદ્ધમ્મે પતિટ્ઠાપેતિ. અયં ખો, ભિક્ખવે, એકપુગ્ગલો લોકે ઉપપજ્જમાનો ઉપ્પજ્જતિ બહુજનહિતાય બહુજનસુખાય, બહુનો જનસ્સ અત્થાય હિતાય સુખાય દેવમનુસ્સાન’’ન્તિ.

૩૧૦. ‘‘નાહં, ભિક્ખવે, અઞ્ઞં એકધમ્મમ્પિ સમનુપસ્સામિ યં એવં મહાસાવજ્જં યથયિદં, ભિક્ખવે, મિચ્છાદિટ્ઠિ. મિચ્છાદિટ્ઠિપરમાનિ, ભિક્ખવે, મહાસાવજ્જાની’’તિ [વજ્જાનીતિ (સી. સ્યા. કં.)].

૩૧૧. ‘‘નાહં, ભિક્ખવે, અઞ્ઞં એકપુગ્ગલમ્પિ સમનુપસ્સામિ યો એવં બહુજનઅહિતાય પટિપન્નો બહુજનઅસુખાય, બહુનો જનસ્સ અનત્થાય અહિતાય દુક્ખાય દેવમનુસ્સાનં યથયિદં, ભિક્ખવે, મક્ખલિ મોઘપુરિસો. સેય્યથાપિ, ભિક્ખવે, નદીમુખે ખિપ્પં [ખિપં (સી. સ્યા. કં. પી.)] ઉડ્ડેય્ય [ઓડ્ડેય્ય (સી.), ઉજ્ઝેય્ય (ક.)] બહૂનં મચ્છાનં અહિતાય દુક્ખાય અનયાય બ્યસનાય; એવમેવં ખો, ભિક્ખવે, મક્ખલિ મોઘપુરિસો મનુસ્સખિપ્પં મઞ્ઞે લોકે ઉપ્પન્નો બહૂનં સત્તાનં અહિતાય દુક્ખાય અનયાય બ્યસનાયા’’તિ.

૩૧૨. ‘‘દુરક્ખાતે, ભિક્ખવે, ધમ્મવિનયે યો ચ સમાદપેતિ [સમાદાપેતિ (?)] યઞ્ચ સમાદપેતિ યો ચ સમાદપિતો તથત્તાય પટિપજ્જતિ સબ્બે તે બહું અપુઞ્ઞં પસવન્તિ. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.

૩૧૩. ‘‘સ્વાક્ખાતે, ભિક્ખવે, ધમ્મવિનયે યો ચ સમાદપેતિ યઞ્ચ સમાદપેતિ યો ચ સમાદપિતો તથત્તાય પટિપજ્જતિ સબ્બે તે બહું પુઞ્ઞં પસવન્તિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.

૩૧૪. ‘‘દુરક્ખાતે, ભિક્ખવે, ધમ્મવિનયે દાયકેન મત્તા જાનિતબ્બા, નો પટિગ્ગાહકેન. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.

૩૧૫. ‘‘સ્વાક્ખાતે, ભિક્ખવે, ધમ્મવિનયે પટિગ્ગાહકેન મત્તા જાનિતબ્બા, નો દાયકેન. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.

૩૧૬. ‘‘દુરક્ખાતે, ભિક્ખવે, ધમ્મવિનયે યો આરદ્ધવીરિયો સો દુક્ખં વિહરતિ. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.

૩૧૭. ‘‘સ્વાક્ખાતે, ભિક્ખવે, ધમ્મવિનયે યો કુસીતો સો દુક્ખં વિહરતિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.

૩૧૮. ‘‘દુરક્ખાતે, ભિક્ખવે, ધમ્મવિનયે યો કુસીતો સો સુખં વિહરતિ. તં કિસ્સ હેતુ? દુરક્ખાતત્તા, ભિક્ખવે, ધમ્મસ્સા’’તિ.

૩૧૯. ‘‘સ્વાક્ખાતે, ભિક્ખવે, ધમ્મવિનયે યો આરદ્ધવીરિયો સો સુખં વિહરતિ. તં કિસ્સ હેતુ? સ્વાક્ખાતત્તા, ભિક્ખવે, ધમ્મસ્સા’’તિ.

૩૨૦. ‘‘સેય્યથાપિ, ભિક્ખવે, અપ્પમત્તકોપિ ગૂથો દુગ્ગન્ધો હોતિ; એવમેવં ખો અહં, ભિક્ખવે, અપ્પમત્તકમ્પિ ભવં ન વણ્ણેમિ, અન્તમસો અચ્છરાસઙ્ઘાતમત્તમ્પિ’’.

૩૨૧. ‘‘સેય્યથાપિ, ભિક્ખવે, અપ્પમત્તકમ્પિ મુત્તં દુગ્ગન્ધં હોતિ… અપ્પમત્તકોપિ ખેળો દુગ્ગન્ધો હોતિ… અપ્પમત્તકોપિ પુબ્બો દુગ્ગન્ધો હોતિ… અપ્પમત્તકમ્પિ લોહિતં દુગ્ગન્ધં હોતિ; એવમેવં ખો અહં, ભિક્ખવે, અપ્પમત્તકમ્પિ ભવં ન વણ્ણેમિ, અન્તમસો અચ્છરાસઙ્ઘાતમત્તમ્પિ’’.

વગ્ગો તતિયો.