९. नवमसिक्खापदं

१०५८. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन भिक्खुनियो उपोसथम्पि न पुच्छन्ति ओवादम्पि न याचन्ति. भिक्खू उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनियो उपोसथम्पि न पुच्छिस्सन्ति ओवादम्पि न याचिस्सन्ती’’ति…पे… सच्चं किर, भिक्खवे, भिक्खुनियो ‘‘उपोसथम्पि न पुच्छन्ति ओवादम्पि न याचन्ती’’ति? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनियो उपोसथम्पि न पुच्छिस्सन्ति ओवादम्पि न याचिस्सन्ति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१०५९. ‘‘अन्वद्धमासं भिक्खुनिया भिक्खुसङ्घतो द्वे धम्मा पच्चासीसितब्बा – उपोसथपुच्छकञ्च ओवादूपसङ्कमनञ्च. तं अतिक्कामेन्तिया पाचित्तिय’’न्ति.

१०६०. अन्वद्धमासन्ति अनुपोसथिकं. उपोसथो नाम द्वे उपोसथा – चातुद्दसिको च पन्नरसिको च.

ओवादो नाम अट्ठ गरुधम्मा. ‘‘उपोसथम्पि न पुच्छिस्सामि ओवादम्पि न याचिस्सामी’’ति धुरं निक्खित्तमत्ते आपत्ति पाचित्तियस्स.

१०६१. अनापत्ति सति अन्तराये, परियेसित्वा दुतियिकं भिक्खुनिं न लभति, गिलानाय, आपदासु, उम्मत्तिकाय, आदिकम्मिकायाति.

नवमसिक्खापदं निट्ठितं.