१०. दसमसिक्खापदं

१०६२. तेन समयेन बुद्धो भगवा सावत्थियं विहरति जेतवने अनाथपिण्डिकस्स आरामे. तेन खो पन समयेन अञ्ञतरा भिक्खुनी पसाखे जातं गण्डं पुरिसेन सद्धिं एकेनेका भेदापेसि. अथ खो सो पुरिसो तं भिक्खुनिं दूसेतुं उपक्कमि. सा विस्सरमकासि. भिक्खुनियो उपधावित्वा तं भिक्खुनिं एतदवोचुं – ‘‘किस्स त्वं, अय्ये, विस्सरमकासी’’ति? अथ खो सा भिक्खुनी भिक्खुनीनं एतमत्थं आरोचेसि. या ता भिक्खुनियो अप्पिच्छा…पे… ता उज्झायन्ति खिय्यन्ति विपाचेन्ति – ‘‘कथञ्हि नाम भिक्खुनी पसाखे जातं गण्डं पुरिसेन सद्धिं एकेनेका भेदापेस्सती’’ति…पे… सच्चं किर, भिक्खवे, भिक्खुनी पसाखे जातं गण्डं पुरिसेन सद्धिं एकेनेका भेदापेतीति [भेदापेसीति (क.)]? ‘‘सच्चं, भगवा’’ति. विगरहि बुद्धो भगवा…पे… कथञ्हि नाम, भिक्खवे, भिक्खुनी पसाखे जातं गण्डं पुरिसेन सद्धिं एकेनेका भेदापेस्सति! नेतं, भिक्खवे, अप्पसन्नानं वा पसादाय…पे… एवञ्च पन, भिक्खवे, भिक्खुनियो इमं सिक्खापदं उद्दिसन्तु –

१०६३. ‘‘या पन भिक्खुनी पसाखे जातं गण्डं वा रुधितं वा अनपलोकेत्वा सङ्घं वा गणं वा पुरिसेन सद्धिं एकेनेका भेदापेय्य वा फालापेय्य वा धोवापेय्य वा आलिम्पापेय्य वा बन्धापेय्य वा मोचापेय्य वा, पाचित्तिय’’न्ति.

१०६४. या पनाति या यादिसा…पे… भिक्खुनीति…पे… अयं इमस्मिं अत्थे अधिप्पेता भिक्खुनीति.

पसाखं नाम अधोनाभि उब्भजाणुमण्डलं. जातन्ति तत्थ जातं. गण्डो नाम यो कोचि गण्डो. रुधितं नाम यं किञ्चि वणं. अनपलोकेत्वाति अनापुच्छा. सङ्घो नाम भिक्खुनिसङ्घो वुच्चति. गणो नाम सम्बहुला भिक्खुनियो वुच्चन्ति. पुरिसो नाम मनुस्सपुरिसो, न यक्खो, न पेतो, न तिरच्छानगतो, विञ्ञू पटिबलो दूसेतुं. सद्धिन्ति एकतो. एकेनेकाति पुरिसो चेव होति भिक्खुनी च.

१०६५. ‘‘भिन्दा’’ति आणापेति, आपत्ति दुक्कटस्स. भिन्ने आपत्ति पाचित्तियस्स. ‘‘फालेही’’ति आणापेति, आपत्ति दुक्कटस्स. फालिते आपत्ति पाचित्तियस्स. ‘‘धोवा’’ति आणापेति, आपत्ति दुक्कटस्स. धोविते [धोते (स्या.)] आपत्ति पाचित्तियस्स. ‘‘आलिम्पा’’ति आणापेति, आपत्ति दुक्कटस्स. लित्ते [आलित्ते (स्या.)] आपत्ति पाचित्तियस्स. ‘‘बन्धाही’’ति आणापेति, आपत्ति दुक्कटस्स. बद्धे आपत्ति पाचित्तियस्स. ‘‘मोचेही’’ति आणापेति, आपत्ति दुक्कटस्स. मुत्ते आपत्ति पाचित्तियस्स.

१०६६. अनापत्ति अपलोकेत्वा भेदापेति वा फालापेति वा धोवापेति वा आलिम्पापेति वा बन्धापेति वा मोचापेति वा, या काचि विञ्ञू दुतियिका [या काचि विञ्ञू दुतिया (स्या.), यो कोचि विञ्ञू दुतियो (क.)] होति, उम्मत्तिकाय, आदिकम्मिकायाति.

दसमसिक्खापदं निट्ठितं.

आरामवग्गो छट्ठो.