७७. उपोसथभेदादि

१४९. अथ खो भिक्खूनं एतदहोसि – ‘‘कति नु खो उपोसथा’’ति? भगवतो एतमत्थं आरोचेसुं. द्वेमे, भिक्खवे, उपोसथा – चातुद्दसिको च पन्नरसिको च. इमे खो, भिक्खवे, द्वे उपोसथाति.

अथ खो भिक्खूनं एतदहोसि – ‘‘कति नु खो उपोसथकम्मानी’’ति? भगवतो एतमत्थं आरोचेसुं. चत्तारिमानि, भिक्खवे, उपोसथकम्मानि – अधम्मेन वग्गं उपोसथकम्मं, अधम्मेन समग्गं उपोसथकम्मं, धम्मेन वग्गं उपोसथकम्मं, धम्मेन समग्गं उपोसथकम्मन्ति. तत्र, भिक्खवे, यदिदं अधम्मेन वग्गं उपोसथकम्मं, न, भिक्खवे, एवरूपं उपोसथकम्मं, कातब्बं. न च मया एवरूपं उपोसथकम्मं अनुञ्ञातं. तत्र, भिक्खवे, यदिदं अधम्मेन समग्गं उपोसथकम्मं, न, भिक्खवे, एवरूपं उपोसथकम्मं कातब्बं. न च मया एवरूपं उपोसथकम्मं अनुञ्ञातं. तत्र, भिक्खवे, यदिदं धम्मेन वग्गं उपोसथकम्मं, न, भिक्खवे, एवरूपं उपोसथकम्मं कातब्बं. न च मया एवरूपं उपोसथकम्मं अनुञ्ञातं. तत्र, भिक्खवे, यदिदं धम्मेन समग्गं उपोसथकम्मं, एवरूपं, भिक्खवे, उपोसथकम्मं कातब्बं, एवरूपञ्च मया उपोसथकम्मं अनुञ्ञातं. तस्मातिह, भिक्खवे, एवरूपं उपोसथकम्मं करिस्साम यदिदं धम्मेन समग्गन्ति – एवञ्हि वो, भिक्खवे, सिक्खितब्बन्ति.