१. अनुसयवारवण्णना

३. पवत्ताविरामवसेनाति अनुसयप्पवत्तिया अविरामवसेन, अविच्छेदवसेनाति अत्थो. कथं पन कुसलाब्याकतचित्तक्खणे अनुसयानं पवत्तीति आह ‘‘मग्गेनेव…पे… पुब्बे’’ति.

२०. चित्तचेतसिकानञ्च ठानं नाम चित्तुप्पादोति आह ‘‘एकस्मिं चित्तुप्पादे’’ति. तेसं तेसं पुग्गलानन्ति पुथुज्जनादीनं पुग्गलानं. पकतिया सभावेन. सभावसिद्धा हि दुक्खाय वेदनाय कामरागस्स अननुसयनट्ठानता. एवं सेसेसुपि यथारहं वत्तब्बं. वक्खति हि ‘‘पकतिया दुक्खादीनं कामरागादीनं अननुसयनट्ठानतं सन्धाय वुत्त’’न्ति. पहानेनाति तस्स तस्स अनुसयस्स समुच्छिन्दनेन. तिण्णं पुग्गलानन्ति पुथुज्जनसोतापन्नसकदागामीनं. द्विन्नं पुग्गलानन्ति अनागामिअरहन्तानं. एत्थाति एतस्मिं पुग्गलोकासवारे. पुरिमनयेति ‘‘तिण्णं पुग्गलान’’न्तिआदिके पुरिमस्मिं विस्सज्जननये. ओकासन्ति उप्पत्तिट्ठानं, इध पन दुक्खवेदना वेदितब्बा. पच्छिमनयेति ‘‘द्विन्नं पुग्गलान’’न्तिआदिके विस्सज्जननये. अनोकासता अननुसयनट्ठानता.

अनुसयवारवण्णना निट्ठिता.