२. पच्चनीकानुलोमवण्णना

१४. अनुलोमपञ्चकस्सातिआदिम्हि अट्ठकथावचने. पुन तत्थाति यथावुत्ते अट्ठकथावचने, तेसु वा अनुलोमपञ्चकपच्चनीकेसु. सब्बत्थ पुग्गलो नुपलब्भतीतिआदिकस्स पाठप्पदेसस्स अत्थो ‘‘सरीरं सन्धाया’’तिआदिना अट्ठकथायं वुत्तनयेन वेदितब्बो अत्थो. पटिकम्मादिपाळिन्ति पटिकम्मनिग्गहउपनयननिगमनपाळिं. तीसु मुखेसूति ‘‘सब्बत्था’’तिआदिना वुत्तेसु तीसु वादमुखेसु. पच्चनीकस्स पाळि वुत्ताति सम्बन्धो. तन्ति पाळिं. सङ्खिपित्वा आगतत्ता सरूपेन अवुत्ते. सुद्धिक…पे… वुत्तं होति तत्थ ‘‘सब्बत्था’’तिआदिना सरीरादिनो परामसनं नत्थि, इध अत्थीति अयमेव विसेसो, अञ्ञं समानन्ति.

सच्चिकट्ठवण्णना निट्ठिता.