५-७. तिस्सोपिकथावण्णना

८९८-९००. अरहत्तप्पत्तिपि गब्भेयेव अत्थीति मञ्ञति. सत्तवस्सिका हि सोपाकसामणेरादयो अरहत्तं पत्ता. सत्तवस्सिकोपि गब्भो अत्थीति परवादिनो अधिप्पायो. आकासेन गच्छन्तो विय सुपिनं आकाससुपिनं. तं अभिञ्ञानिब्बत्तं मञ्ञतीति निदस्सनं कत्वा दस्सेन्तो आह ‘‘आकासगमनादिअभिञ्ञा विया’’ति. हेट्ठिमानं चतुन्नं वा मग्गानं अधिगमेन धम्माभिसमयो अग्गफलाधिगमेन अरहत्तप्पत्ति च सुपिने अत्थीति मञ्ञतीति योजना.

तिस्सोपिकथावण्णना निट्ठिता.