८. समाधिकथावण्णना

६२५-६२६. समं ठपनट्ठेनाति समं विसमं लीनुद्धच्चादिं पटिबाहित्वा, विक्खेपमेव वा विद्धंसेत्वा ठपनट्ठेन. ‘‘चित्तसन्तति समाधी’’ति वदन्तेन तस्स चेतसिकभावो पटिक्खित्तो होतीति आह ‘‘चेतसिकन्तरं अत्थीति अग्गहेत्वा’’ति. भावनाय आहितविसेसाय एकग्गताय विज्जमानविसेसपटिक्खेपो छलं, सो पनस्स अनाहितविसेसाय एकग्गताय सामञ्ञेनाति आह ‘‘सामञ्ञमत्तेना’’ति.

समाधिकथावण्णना निट्ठिता.