३. उक्कोटनसिक्खापदवण्णना

३९२. ततिये यथापतिट्ठितभावेन पतिट्ठातुं न देन्तीति तेसं पवत्तिआकारदस्सनत्थं वुत्तं. यं पन धम्मेन अधिकरणं निहतं, तं सुनिहतमेव. सचे विप्पकते कम्मे पटिक्कोसति, तं सञ्ञापेत्वाव कातब्बं. इतरथा कम्मञ्च कुप्पति, कारकानञ्च आपत्ति. सेसमेत्थ उत्तानमेव. यथाधम्मं निहतभावो, जानना, उक्कोटनाति इमानि पनेत्थ तीणि अङ्गानि.

उक्कोटनसिक्खापदवण्णना निट्ठिता.