८. दुब्बण्णकरणसिक्खापदवण्णना

३६८. अट्ठमे ‘‘चम्मकारनीलं नाम पकतिनील’’न्ति तीसुपि गण्ठिपदेसु वुत्तं. गण्ठिपदे पन ‘‘चम्मकारा उदके तिपुमलं अयगूथञ्च पक्खिपित्वा चम्मं काळं करोन्ति, तं चम्मकारनील’’न्ति वुत्तं. सेसमेत्थ उत्तानमेव. वुत्तप्पकारस्स चीवरस्स अकतकप्पता, अनट्ठचीवरादिता, निवासनं वा पारुपनं वाति इमानि पनेत्थ तीणि अङ्गानि.

दुब्बण्णकरणसिक्खापदवण्णना निट्ठिता.