सेखियकथा

१८७०. यो अनादरियेनेव, पुरतो पच्छतोपि वा;

ओलम्बेत्वा निवासेय्य, तस्स चापत्ति दुक्कटं.

१८७१. हत्थिसोण्डादितुल्यं तु, निवासेन्तस्स दुक्कटं;

आपत्तिभीरुना निच्चं, वत्थब्बं परिमण्डलं.

१८७२. जाणुमण्डलतो हेट्ठा, अट्ठङ्गुलप्पमाणकं;

ओतारेत्वा निवत्थब्बं, ततो ऊनं न वट्टति.

१८७३. असञ्चिच्चासतिस्सापि, अजानन्तस्स केवलं;

अनापत्ति गिलानस्सा-पदासुम्मत्तकादिनो.

परिमण्डलकथा.

१८७४. उभो कोणे समं कत्वा, सादरं परिमण्डलं;

कत्वा पारुपितब्बेवं, अकरोन्तस्स दुक्कटं.

१८७५. अविसेसेन वुत्तं तु, इदं सिक्खापदद्वयं;

तस्मा घरे विहारे वा, कत्तब्बं परिमण्डलं.

दुतियं.

१८७६. गण्ठिकं पटिमुञ्चित्वा, कत्वा कोणे उभो समं;

छादेत्वा मणिबन्धञ्च, गन्तब्बं गीवमेव च.

१८७७. तथा अकत्वा भिक्खुस्स, जत्तूनिपि उरम्पि च;

विवरित्वा यथाकामं, गच्छतो होति दुक्कटं.

ततियं.

१८७८. गलवाटकतो उद्धं, सीसञ्च मणिबन्धतो;

हत्थे पिण्डिकमंसम्हा, हेट्ठा पादे उभोपि च.

१८७९. विवरित्वावसेसञ्च, छादेत्वा चे निसीदति;

होति सो सुप्पटिच्छन्नो, दोसो वासूपगस्स न.

चतुत्थं.

१८८०. हत्थं वा पन पादं वा, अचालेन्तेन भिक्खुना;

सुविनीतेन गन्तब्बं, छट्ठे नत्थि विसेसता.

पञ्चमछट्ठानि.

१८८१. सतीमताविकारेन, युगमत्तञ्च पेक्खिना;

सुसंवुतेन गन्तब्बं, भिक्खुनोक्खित्तचक्खुना.

१८८२. यत्थ कत्थचि हि ट्ठाने, एकस्मिं अन्तरे घरे;

ठत्वा परिस्सयाभावं, ओलोकेतुम्पि वट्टति.

१८८३. यो अनादरियं कत्वा, ओलोकेन्तो तहिं तहिं;

सचेन्तरघरे याति, दुक्कटं अट्ठमं तथा.

सत्तमट्ठमानि.

१८८४. एकतो उभतो वापि, हुत्वा उक्खित्तचीवरो;

इन्दखीलकतो अन्तो, गच्छतो होति दुक्कटं.

नवमं.

१८८५. तथा निसिन्नकालेपि, नीहरन्तेन कुण्डिकं;

अनुक्खिपित्वा दातब्बा, दोसो वासूपगस्स न.

दसमं.

पठमो वग्गो.

१८८६. न वट्टति हसन्तेन, गन्तुञ्चेव निसीदितुं;

वत्थुस्मिं हसनीयस्मिं, सितमत्तं तु वट्टति.

पठमदुतियानि.

१८८७. अप्पसद्देन गन्तब्बं, चतुत्थेपि अयं नयो;

महासद्दं करोन्तस्स, उभयत्थापि दुक्कटं.

ततियचतुत्थानि.

१८८८. कायप्पचालकं कत्वा, बाहुसीसप्पचालकं;

गच्छतो दुक्कटं होति, तथेव च निसीदतो.

१८८९. कायं बाहुञ्च सीसञ्च, पग्गहेत्वा उजुं पन;

गन्तब्बमासितब्बञ्च, समेनिरियापथेन तु.

१८९०. निसीदनेन युत्तेसु, तीसु वासूपगस्स हि;

अनापत्तीति ञातब्बं, विञ्ञुना विनयञ्ञुना.

दुतियो वग्गो.

१८९१. खम्भं कत्वा ससीसं वा, पारुपित्वान गच्छतो;

दुक्कटं मुनिना वुत्तं, तथा उक्कुटिकाय वा.

१८९२. हत्थपल्लत्थिकायापि, दुस्सपल्लत्थिकाय वा;

तस्सन्तरघरे होति, निसीदन्तस्स दुक्कटं.

१८९३. दुतिये च चतुत्थे च, छट्ठे वासूपगस्स तु;

अनापत्तीति सारुप्पा, छब्बीसति पकासिता.

छट्ठं.

१८९४. सक्कच्चं सतियुत्तेन, भिक्खुना पत्तसञ्ञिना;

पिण्डपातो गहेतब्बो, समसूपोव विञ्ञुना.

१८९५. सूपो भत्तचतुब्भागो, ‘‘समसूपो’’ति वुच्चति;

मुग्गमासकुलत्थानं, सूपो ‘‘सूपो’’ति वुच्चति.

१८९६. अनापत्ति असञ्चिच्च, गिलानस्स रसेरसे;

तथेव ञातकादीनं, अञ्ञत्थाय धनेन वा.

सत्तमट्ठमनवमानि.

१८९७. अन्तोलेखापमाणेन, पत्तस्स मुखवट्टिया;

पूरितोव गहेतब्बो, अधिट्ठानूपगस्स तु.

१८९८. तत्थ थूपीकतं कत्वा, गण्हतो यावकालिकं;

यं किञ्चि पन भिक्खुस्स, होति आपत्ति दुक्कटं.

१८९९. अधिट्ठानूपगे पत्ते, कालिकत्तयमेव च;

सेसे थूपीकतं सब्बं, वट्टतेव न संसयो.

१९००. द्वीसु पत्तेसु भत्तं तु, गहेत्वा पत्तमेककं;

पूरेत्वा यदि पेसेति, भिक्खूनं पन वट्टति.

१९०१. पत्ते पक्खिप्पमानं यं, उच्छुखण्डफलादिकं;

ओरोहति सचे हेट्ठा, न तं थूपीकतं सिया.

१९०२. पुप्फतक्कोलकादीनं, ठपेत्वा चे वटंसकं;

दिन्नं अयावकालित्ता, न तं थूपीकतं सिया.

१९०३. वटंसकं तु पूवस्स, ठपेत्वा ओदनोपरि;

पिण्डपातं सचे देन्ति, इदं थूपीकतं सिया.

१९०४. भत्तस्सूपरि पण्णं वा, थालकं वापि किञ्चिपि;

ठपेत्वा परिपूरेत्वा, सचे गण्हाति वट्टति.

१९०५. पटिग्गहेतुमेवस्स, तं तु सब्बं न वट्टति;

गहितं सुगहितं, पच्छा, भुञ्जितब्बं यथासुखं.

ततियो वग्गो.

१९०६. पठमं दुतियं वुत्त-नयं तु ततिये पन;

उपरोधिमदस्सेत्वा, भोत्तब्बं पटिपाटिया.

१९०७. अञ्ञेसं अत्तनो भत्तं, आकिरं पन भाजने;

नत्थोमसति चे दोसो, तथा उत्तरिभङ्गकं.

ततियं.

१९०८. चतुत्थे यं तु वत्तब्बं, वुत्तं पुब्बे असेसतो;

पञ्चमे मत्थकं दोसो, मद्दित्वा परिभुञ्जतो.

१९०९. अनापत्ति गिलानस्स, परित्तेपि च सेसके;

एकतो पन मद्दित्वा, संकड्ढित्वान भुञ्जतो.

चतुत्थपञ्चमानि.

१९१०. यो भिय्योकम्यताहेतु, सूपं वा ब्यञ्जनम्पि वा;

पटिच्छादेय्य भत्तेन, तस्स चापत्ति दुक्कटं.

छट्ठं.

१९११. विञ्ञत्तियं तु वत्तब्बं, अपुब्बं नत्थि किञ्चिपि;

अट्ठमे पन उज्झाने, गिलानोपि न मुच्चति.

१९१२. ‘‘दस्सामि दापेस्सामी’’ति, ओलोकेन्तस्स भिक्खुनो;

अनापत्तीति ञातब्बं, न च उज्झानसञ्ञिनो.

अट्ठमं.

१९१३. महन्तं पन मोरण्डं, कुक्कुटण्डञ्च खुद्दकं;

तेसं मज्झप्पमाणेन, कत्तब्बो कबळो पन.

१९१४. खज्जके पन सब्बत्थ, मूलखादनियादिके;

फलाफले अनापत्ति, गिलानुम्मत्तकादिनो.

नवमं.

१९१५. अदीघो पन कातब्बो, आलोपो परिमण्डलो;

खज्जतुत्तरिभङ्गस्मिं, अनापत्ति फलाफले.

दसमं.

चतुत्थो वग्गो.

१९१६. अनाहटे मुखद्वारं, अप्पत्ते कबळे पन;

अत्तनो च मुखद्वारं, विवरन्तस्स दुक्कटं.

पठमं.

१९१७. मुखे च सकलं हत्थं, पक्खिपन्तस्स दुक्कटं;

मुखे च कबळं कत्वा, कथेतुं न च वट्टति.

१९१८. वचनं यत्तकेनस्स, परिपुण्णं न होति हि;

मुखस्मिंतत्तके सन्ते, ब्याहरन्तस्स दुक्कटं.

१९१९. मुखे हरीतकादीनि, पक्खिपित्वा कथेति यो;

वचनं परिपुण्णं चे, कथेतुं पन वट्टति.

दुतियततियानि.

१९२०. यो पिण्डुक्खेपकं भिक्खु, कबळच्छेदकम्पि वा;

मक्कटो विय गण्डे वा, कत्वा भुञ्जेय्य दुक्कटं.

चतुत्थपञ्चमछट्ठानि.

१९२१. निद्धुनित्वान हत्थं वा, भत्तं सित्थावकारकं;

जिव्हानिच्छारकं वापि, तथा ‘‘चपु चपू’’ति वा.

१९२२. अनादरवसेनेव, भुञ्जतो होति दुक्कटं;

सत्तमे अट्ठमे नत्थि, दोसो कचवरुज्झने.

सत्तमदसमानि.

पञ्चमो वग्गो.

१९२३. कत्वा एवं न भोत्तब्बं, सद्दं ‘‘सुरु सुरू’’ति च;

हत्थनिल्लेहकं वापि, न च वट्टति भुञ्जितुं.

१९२४. फाणितं घनयागुं वा, गहेत्वा अङ्गुलीहि तं;

मुखे अङ्गुलियो भोत्तुं, पवेसेत्वापि वट्टति.

१९२५. न पत्तो लेहितब्बोव, एकायङ्गुलिकाय वा;

एकओट्ठोपि जिव्हाय, न च निल्लेहितब्बको.

चतुत्थं.

१९२६. सामिसेन तु हत्थेन, न च पानीयथालकं;

गहेतब्बं, पटिक्खित्तं, पटिक्कूलवसेन हि.

१९२७. पुग्गलस्स च सङ्घस्स, गहट्ठस्सत्तनोपि च;

सन्तको पन सङ्खो वा, सरावं वापि थालकं.

१९२८. तस्मा न च गहेतब्बं, गण्हतो होति दुक्कटं;

अनामिसेन हत्थेन, गहणं पन वट्टति.

पञ्चमं.

१९२९. उद्धरित्वापि भिन्दित्वा, गहेत्वा वा पटिग्गहे;

नीहरित्वा अनापत्ति, छड्डेन्तस्स घरा बहि.