भिक्खुनीविभङ्गो

१९६४. भिक्खुनीनं हितत्थाय, विभङ्गं यं जिनोब्रवि;

तस्मिं अपि समासेन, किञ्चिमत्तं भणामहं.

पाराजिककथा

१९६५. छन्दसो मेथुनं धम्मं, पटिसेवेय्य या पन;

होति पाराजिका नाम, समणी सा पवुच्चति.

१९६६. मनुस्सपुरिसादीनं, नवन्नं यस्स कस्सचि;

सजीवस्साप्यजीवस्स, सन्थतं वा असन्थतं.

१९६७. अत्तनो तिविधे मग्गे, येभुय्यक्खायितादिकं;

अङ्गजातं पवेसेन्ती, अल्लोकासे पराजिता.

१९६८. इतो परमवत्वाव, साधारणविनिच्छयं;

असाधारणमेवाहं, भणिस्सामि समासतो.

१९६९. अधक्खकं सरीरकं, यदुब्भजाणुमण्डलं;

सरीरकेन चे तेन, फुसेय्य भिक्खुनी पन.

१९७०. अवस्सुतस्सावस्सुता, मनुस्सपुग्गलस्स या;

सरीरमस्स तेन वा, फुट्ठा पाराजिका सिया.

१९७१. कप्परस्स पनुद्धम्पि, गहितं उब्भजाणुना;

यथावुत्तप्पकारेन, कायेनानेन अत्तनो.

१९७२. पुरिसस्स तथा काय- पटिबद्धं फुसन्तिया;

तथा यथापरिच्छिन्न- कायबद्धेन अत्तनो.

१९७३. अवसेसेन वा तस्स, कायं कायेन अत्तनो;

होति थुल्लच्चयं तस्सा, पयोगे पुरिसस्स च.

१९७४. यक्खपेततिरच्छान- पण्डकानं अधक्खकं;

उब्भजाणुं तथेवस्सा, उभतोवस्सवे सति.

१९७५. एकतोवस्सवे चापि, थुल्लच्चयमुदीरितं;

अवसेसे च सब्बत्थ, होति आपत्ति दुक्कटं.

१९७६. उब्भक्खकमधोजाणु-मण्डलं पन यं इध;

कप्परस्स च हेट्ठापि, गतं एत्थेव सङ्गहं.

१९७७. केलायति सचे भिक्खु, सद्धिं भिक्खुनिया पन;

उभिन्नं कायसंसग्ग-रागे सति हि भिक्खुनो.

१९७८. होति सङ्घादिसेसोव, नासो भिक्खुनिया सिया;

कायसंसग्गरागो च, सचे भिक्खुनिया सिया.

१९७९. भिक्खुनो मेथुनो रागो, गेहपेमम्पि वा भवे;

तस्सा थुल्लच्चयं वुत्तं, भिक्खुनो होति दुक्कटं.

१९८०. उभिन्नं मेथुने रागे, गेहपेमेपि वा सति;

अविसेसेन निद्दिट्ठं, उभिन्नं दुक्कटं पन.

१९८१. यस्स यत्थ मनोसुद्धं, तस्स तत्थ न दोसता;

उभिन्नम्पि अनापत्ति, उभिन्नं चित्तसुद्धिया.

१९८२. कायसंसग्गरागेन, भिन्दित्वा पठमं पन;

पच्छा दूसेति चे नेव, होति भिक्खुनिदूसको.

१९८३. अथ भिक्खुनिया फुट्ठो, सादियन्तोव चेतसा;

निच्चलो होति चे भिक्खु, न होतापत्ति भिक्खुनो.

१९८४. भिक्खुनी भिक्खुना फुट्ठा, सचे होतिपि निच्चला;

अधिवासेति सम्फस्सं, तस्सा पाराजिकं सिया.

१९८५. तथा थुल्लच्चयं खेत्ते, दुक्कटञ्च विनिद्दिसे;

वुत्तत्ता ‘‘कायसंसग्गं, सादियेय्या’’ति सत्थुना.

१९८६. तस्सा क्रियसमुट्ठानं, एवं सति न दिस्सति;

इदं तब्बहुलेनेव, नयेन परिदीपितं.

१९८७. अनापत्ति असञ्चिच्च, अजानित्वामसन्तिया;

सति आमसने तस्सा, फस्सं वासादियन्तिया.

१९८८. वेदनट्टाय वा खित्त-चित्तायुम्मत्तिकाय वा;

समुट्ठानादयो तुल्या, पठमन्तिमवत्थुना.

उब्भजाणुमण्डलकथा.

१९८९. पाराजिकत्तं जानन्ति, सलिङ्गे तु ठिताय हि;

‘‘न कस्सचि परस्साहं, आरोचेस्सामि दानि’’ति.

१९९०. धुरे निक्खित्तमत्तस्मिं, सा च पाराजिका सिया;

अयं वज्जपटिच्छादि- नामिका पन नामतो.

१९९१. सेसं सप्पाणवग्गस्मिं, दुट्ठुल्लेन समं नये;

विसेसो तत्र पाचित्ति, इध पाराजिकं सिया.

वज्जपटिच्छादिकथा.

१९९२. सङ्घेनुक्खित्तको भिक्खु, ठितो उक्खेपने पन;

यंदिट्ठिको च सो तस्सा, दिट्ठिया गहणेन तं.

१९९३. अनुवत्तेय्य या भिक्खुं, भिक्खुनी सा विसुम्पि च;

सङ्घमज्झेपि अञ्ञाहि, वुच्चमाना तथेव च.

१९९४. अचजन्तीव तं वत्थुं, गहेत्वा यदि तिट्ठति;

तस्स कम्मस्स ओसाने, उक्खित्तस्सानुवत्तिका.

१९९५. होति पाराजिकापन्ना, होतासाकियधीतरा;

पुन अप्पटिसन्धेया, द्विधा भिन्ना सिला विय.

१९९६. अधम्मे पन कम्मस्मिं, निद्दिट्ठं तिकदुक्कटं;

समुट्ठानादयो सब्बे, वुत्ता समनुभासने.

उक्खित्तानुवत्तिककथा.

१९९७. अपाराजिकखेत्तस्स, गहणं यस्स कस्सचि;

अङ्गस्स पन तं हत्थ-ग्गहणन्ति पवुच्चति.

१९९८. पारुतस्स निवत्थस्स, गहणं यस्स कस्सचि;

एतं सङ्घाटिया कण्ण-ग्गहणन्ति पवुच्चति.

१९९९. कायसंसग्गसङ्खात-असद्धम्मस्स कारणा;

भिक्खुनी हत्थपासस्मिं, तिट्ठेय्य पुरिसस्स वा.

२०००. सल्लपेय्य तथा तत्थ, ठत्वा तु पुरिसेन वा;

सङ्केतं वापि गच्छेय्य, इच्छेय्या गमनस्स वा.

२००१. तदत्थाय पटिच्छन्न-ट्ठानञ्च पविसेय्य वा;

उपसंहरेय्य कायं वा, हत्थपासे ठिता पन.

२००२. अयमस्समणी होति, विनट्ठा अट्ठवत्थुका;

अभब्बा पुनरुळ्हाय, छिन्नो तालोव मत्थके.

२००३. अनुलोमेन वा वत्थुं, पटिलोमेन वा चुता;

अट्ठमं परिपूरेन्ती, तथेकन्तरिकाय वा.

२००४. अथादितो पनेकं वा, द्वे वा तीणिपि सत्त वा;

सतक्खत्तुम्पि पूरेन्ती, नेव पाराजिका सिया.

२००५. आपत्तियो पनापन्ना, देसेत्वा ताहि मुच्चति;

धुरनिक्खेपनं कत्वा, देसिता गणनूपिका.

२००६. न होतापत्तिया अङ्गं, सउस्साहाय देसिता;

देसनागणनं नेति, देसितापि अदेसिता.

२००७. अनापत्ति असञ्चिच्च, अजानित्वा करोन्तिया;

समुट्ठानादयो सब्बे, अनन्तरसमा मता.

२००८. ‘‘असद्धम्मो’’ति नामेत्थ, कायसंसग्गनामको;

अयमुद्दिसितो अत्थो, सब्बअट्ठकथासुपि.

२००९. विञ्ञू पटिबलो काय-संसग्गं पटिपज्जितुं;

कायसंसग्गभावे तु, साधकं वचनं इदं.

अट्ठवत्थुककथा.

२०१०. अवस्सुता पटिच्छादी, उक्खित्ता अट्ठवत्थुका;

असाधारणपञ्ञत्ता, चतस्सोव महेसिना.

पाराजिककथा निट्ठिता.

सङ्घादिसेसकथा

२०११. या पन भिक्खुनी उस्सयवादा;

अट्टकरी मुखरी विहरेय्य;

येन केनचि नरेनिध सद्धिं;

सा गरुकं किर दोसमुपेति.

२०१२. सक्खिं वापि सहायं वा, परियेसति दुक्कटं;

पदे पदे तथा अट्टं, कातुं गच्छन्तियापि च.

२०१३. आरोचेति सचे पुब्बं, भिक्खुनी अत्तनो कथं;

दिस्वा वोहारिकं तस्सा, होति आपत्ति दुक्कटं.

२०१४. आरोचेति सचे पच्छा, इतरो अत्तनो कथं;

होति भिक्खुनिया तस्सा, थुल्लच्चयमनन्तरं.

२०१५. आरोचेतितरो पुब्बं, सचे सो अत्तनो कथं;

पच्छा भिक्खुनी चे पुब्ब-सदिसोव विनिच्छयो.

२०१६. ‘‘आरोचेही’’ति वुत्ता चे, ‘‘कथं तव ममापि च’’;

आरोचेतु यथाकामं, पठमे दुक्कटं सिया.

२०१७. दुतियारोचने तस्सा, थुल्लच्चयमुदीरितं;

उपासकेन वुत्तेपि, अयमेव विनिच्छयो.

२०१८. आरोचितकथं सुत्वा, उभिन्नम्पि यथा तथा;

विनिच्छये कते तेहि, अट्टे पन च निट्ठिते.

२०१९. अट्टस्स परियोसाने, जये भिक्खुनिया पन;

पराजयेपि वा तस्सा, होति सङ्घादिसेसता.

२०२०. दूतं वापि पहिणित्वा, आगन्त्वान सयम्पि वा;

पच्चत्थिकमनुस्सेहि, आकड्ढीयति या पन.

२०२१. आरामे पन अञ्ञेहि, अनाचारं कतं सचे;

अनोदिस्स परं किञ्चि, रक्खं याचति तत्थ या.

२०२२. याय किञ्चि अवुत्ताव, धम्मट्ठा सयमेव तु;

सुत्वा तं अञ्ञतो अट्टं, निट्ठापेन्ति सचे पन.

२०२३. तस्सा, उम्मत्तिकादीन-मनापत्ति पकासिता;

कथिनेन समुट्ठानं, तुल्यं सकिरियं इदं.

अट्टकारिकथा.

२०२४. जानन्ती भिक्खुनी चोरिं, वज्झं विदितमेव या;

सङ्घं अनपलोकेत्वा, राजानं गणमेव वा.

२०२५. वुट्ठापेय्य विना कप्पं, चोरिवुट्ठापनं पन;

सङ्घादिसेसमापत्ति-मापन्ना नाम होति सा.

२०२६. पञ्चमासग्घनं याय, हरितं परसन्तकं;

अतिरेकग्घनं वापि, अयं ‘‘चोरी’’ति वुच्चति.

२०२७. भिक्खुनीसु पनञ्ञासु, तित्थियेसुपि वा तथा;

या पब्बजितपुब्बा सा, अयं ‘‘कप्पा’’ति वुच्चति.

२०२८. वुट्ठापेति च या चोरिं, ठपेत्वा कप्पमेविदं;

सचे आचरिनिं पत्तं, चीवरं परियेसति.

२०२९. सम्मन्नति च सीमं वा, तस्सा आपत्ति दुक्कटं;

ञत्तिया दुक्कटं द्वीहि, कम्मवाचाहि च द्वयं.

२०३०. थुल्लच्चयस्स, कम्मन्ते, गरुकं निद्दिसे बुधो;

गणो आचरिनी चेव, न च मुच्चति दुक्कटं.

२०३१. अनापत्ति अजानन्ती, वुट्ठापेति, तथेव च;

कप्पं वा अपलोकेत्वा, तस्सा उम्मत्तिकाय वा.

२०३२. चोरिवुट्ठापनं नाम, जायते वाचचित्ततो;

कायवाचादितो चेव, सचित्तञ्च क्रियाक्रियं.

चोरिवुट्ठापनकथा.