निस्सग्गियकथा

५५१. खोमं कप्पासकोसेय्यं, साणं भङ्गञ्च कम्बलं;

चीवरं छब्बिधं वुत्तं, जातितो पन कप्पियं.

५५२. दुकूलञ्चेव पत्तुण्णं, चिनं सोमारपट्टकं;

इद्धिजं देवदिन्नञ्च, तस्सेतं अनुलोमिकं.

५५३. तिचीवरं परिक्खार-चोळञ्च मुखपुञ्छनं;

निसीदनमधिट्ठेय्य, पच्चत्थरणमेव च.

५५४. एकाहम्पि विना भिक्खु, न वसेय्य तिचीवरं;

न वसेय्य तथाधिट्ठा, चातुमासं निसीदनं.

५५५. रजित्वा कप्पियं बिन्दुं, दत्वा तत्थ तिचीवरं;

उपपन्नं पमाणेन, अधिट्ठातब्बमेव तं.

५५६. पच्छिमन्तेन सङ्घाटि, दीघसो मुट्ठिपञ्चका;

मुट्ठित्तिका च तिरियं, उत्तमन्तेन सा पन.

५५७. सत्थुनो चीवरूनापि, वट्टतीति पकासिता;

इदमेवुत्तरासङ्गे, पमाणं परिदीपितं.

५५८. मुट्ठिपञ्चकं दीघन्तं, पमाणं तिरियन्ततो;

अड्ढतेय्यं द्विहत्थं वा, सेसे अन्तरवासके.

५५९. अहताहतकप्पानं, सङ्घाटि दिगुणा मता;

एकपट्टुत्तरासङ्गो, एवमन्तरवासको.

५६०. उतुद्धटानं पन चीवरानं;

सङ्घाटि भिक्खुस्स चतुग्गुणा वा;

दुवेपि सेसा दिगुणाव वुत्ता;

यथासुखं वट्टति पंसुकूलं.

५६१. तीणिपि द्वेपि चेकं वा, छिन्दितब्बं पहोति चे;

सब्बेसु अप्पहोन्तेसु, देय्यमन्वाधिकम्पि वा.

५६२. अच्छिन्नं वा अनादिन्नं, धारेन्तस्स तिचीवरं;

भिक्खुनो दुक्कटं वुत्तं, दुब्भोगेन च सेवतो.

५६३. कुसिं अड्ढकुसिञ्चापि, मण्डलं अड्ढमण्डलं;

विवट्टं अनुविवट्टं, बाहन्तम्पि च भिक्खुनो.

५६४. दस्सेत्वाव विधिं सब्बं, पञ्चकादिप्पभेदकं;

छिन्नं समणसारुप्पं, कातब्बं तु तिचीवरं.

५६५. दानेनच्छिज्जगाहेन, विस्सासग्गहणेन च;

हीनायावत्तनेनापि, सिक्खाय च पहानतो.

५६६. पच्चुद्धारविनासेहि, लिङ्गस्स परिवत्तना;

सब्बं भिज्जतिधिट्ठानं, छिद्दभावे तिचीवरं.

५६७. कनिट्ठस्सङ्गुलस्सेव, नखपिट्ठिप्पमाणकं;

विनिविद्धं पनच्छिद्द-मधिट्ठानविनासनं.

५६८. एको तन्तुपि अच्छिन्नो, अधिट्ठानं न भिन्दति;

सेतभावं करोन्तेन, धोतम्पि रजकेन वा.

५६९. पठमं अग्गळं दत्वा, पच्छा छिन्दति रक्खति;

घटेत्वा कोटियो द्वे वा, पच्छा छिन्दति रक्खति.

५७०. चतुरट्ठङ्गुला ओरं, एकद्विन्नं तिरीयतो;

तिण्णम्पि दीघतो छिद्दं, भिन्दतेव विदत्थिया.

५७१. निसीदनस्स दीघेन, भवन्ति द्वे विदत्थियो;

वित्थारेन दियड्ढा च, सुगतस्स विदत्थिया.

५७२. होन्ति कण्डुप्पटिच्छादि, तिरियं द्वे विदत्थियो;

दीघतोपि चतस्सोव, सुगतस्स विदत्थिया.

५७३. दीघतो सुगतस्सेव, भवन्ति छ विदत्थियो;

वित्थारेनड्ढतेय्याव, सिया वस्सिकसाटिका.

५७४. मुनिना तीसु एतेसु, करोन्तस्स तदुत्तरिं;

अधिकच्छेदनं तस्स, पाचित्तियमुदीरितं.

५७५. मुखपुञ्छनचोळस्स, पच्चत्थरणकस्स वा;

पमाणं अप्पमाणेन, न चेव परिदीपितं.

५७६. सदसं अदसं सब्बं, पच्चत्थरणचीवरं;

महन्तं खुद्दकं एक-मनेकम्पि च वट्टति.

५७७. मुखपुञ्छनचोळेकं, द्वेपि वट्टन्ति सब्बथा;

सदसं अदसं वापि, सदसंव निसीदनं.

५७८. अदसा रजितायेव, वट्टतादिन्नकप्पका;

वुत्ता कण्डुप्पटिच्छादि, तथा वस्सिकसाटिका.

५७९. गणनं वा पमाणं वा, न परिक्खारचोळके;

पमाणगणनातीति, भणन्ति पकतञ्ञुनो.

५८०. सुगतट्ठङ्गुलायामं, चतुरङ्गुलवित्थतं;

विकप्पनुपगं होति, पच्छिमं नाम चीवरं.

५८१. परिस्सावपटं पत्त-पोत्थकत्थविकादिकं;

अधिट्ठेय्य परिक्खार-चोळं पच्छिमचीवरं.

५८२. बहूनि एकतो कत्वा, अधिट्ठातुम्पि वट्टति;

मातुआदीनमत्थाय, ठपिते नत्थि दोसता.

५८३. वस्समासे अधिट्ठेय्य, चतुरो वस्ससाटिकं;

पुन पच्चुद्धरित्वा तं, विकप्पेय्य ततो परं.

५८४. ताव कण्डुप्पटिच्छादिं, याव रोगो न सम्मति;

अधिट्ठहित्वा ततो उद्धं, उद्धरित्वा विकप्पये.

५८५. ‘‘इमं कण्डुप्पटिच्छादिं, इममन्तरवासकं;

अधिट्ठामी’’तिधिट्ठेय्य, सेसेसुपि अयं नयो.

५८६. ‘‘इमं कण्डुप्पटिच्छादिं, एत’’न्ति च असम्मुखे;

वत्वा पच्चुद्धरेय्येवं, सेसेसुपि विचक्खणो.

५८७. आभोगं मनसा कत्वा, कायेन फुसनाकतं;

वचसाधिट्ठितञ्चाति, अधिट्ठानं द्विधा मतं.

५८८. इति सब्बमिदं वुत्तं, तेचीवरिकभिक्खुनो;

तथा वत्वावधिट्ठेय्य, तं परिक्खारचोळिको.

५८९. तिचीवरं परिक्खार-चोळं कातुम्पि वट्टति;

एवं चुदोसिते वुत्तो, परिहारो निरत्थको.

५९०. न, तेचीवरिकस्सेव, वुत्तत्ता तत्थ सत्थुना;

तं परिक्खारचोळस्स, तस्मा सब्बम्पि वट्टति.

५९१. ‘‘अधिट्ठेति विकप्पेति, अनापत्ती’’ति एत्थ च;

अधिट्ठातब्बकस्सेव, विकप्पनविधानतो.

५९२. भिक्खुस्सेवं करोन्तस्स, न दोसो उपलब्भति;

एवञ्च न सिया कस्मा, मुखपुञ्छनकादिकं.

५९३. मुखपुञ्छनकादीनं, तेसं किच्चविधानतो;

अकिच्चस्सामिकस्सस्स, अधिट्ठानं तु युज्जति.

५९४. निधानमुखमेतन्ति, महापच्चरियं पन;

वुत्तत्ता च निसेधेतुं, न सक्का विनयञ्ञुना.

५९५. चीवरं परिपुण्णन्ति, निदानुप्पत्तितोपि च;

निधानमुखमेतन्ति, वेदितब्बं विभाविना.

५९६. कुसवाकादिचीरानि, कम्बलं केसवालजं;

थुल्लच्चयं धारयतो-लूकपक्खाजिनक्खिपे.

५९७. कदलेरकदुस्सेसु, अक्कदुस्से च पोत्थके;

दुक्कटं तिरिटे वापि, वेठने कञ्चुकेपि च.

५९८. सब्बनीलकमञ्जेट्ठ-कण्हलोहितपीतके;

महानाममहारङ्ग-रत्तेसुपि च दुक्कटं.

५९९. अच्छिन्नदसके दीघ-फलपुप्फदसेसु च;

अच्छिन्नचीवरस्सेत्थ, नत्थि किञ्चि अकप्पियं.

६००. अधिट्ठेति विकप्पेति, विस्सज्जेति विनस्सति;

अन्तोदसाहं विस्सासे, अनापत्ति पकासिता.

६०१. कथिनं नाम नामेन, समुट्ठानमिदं पन;

अचित्तमक्रियं वुत्तं, तिचित्तञ्च तिवेदनं.

पठमकथिनकथा.

६०२. गामादीसु पदेसेसु, तिपञ्चसु तिचीवरं;

ठपेत्वा एकरत्तम्पि, सङ्घसम्मुतिया विना.

६०३. भिक्खुनो पन तेनस्स, विप्पवत्थुं न वट्टति;

होति निस्सग्गियं विप्प-वसतो अरुणुग्गमे.

६०४. चीवरं निक्खिपित्वान, न्हायन्तस्सेव रत्तियं;

अरुणे उट्ठिते किं नु, कातब्बं तेन भिक्खुना.

६०५. दुक्कटं मुनिना वुत्तं, निस्सग्गियनिवासने;

तब्भया पन सो भिक्खु, नग्गो गच्छति दुक्कटं.

६०६. अच्छिन्नचीवरट्ठाने, ठितत्ता पन भिक्खुनो;

न तस्साकप्पियं नाम, चीवरं अत्थि किञ्चिपि.

६०७. निगासेत्वा गहेत्वा च, गन्त्वा भिक्खुस्स सन्तिकं;

निस्सज्जित्वा पनापत्ति, देसेतब्बाव विञ्ञुना.

६०८. परस्स निस्सज्जित्वा तं, दुक्कटं परिभुञ्जतो;

पयोगे च पयोगे च, होति पारुपनादिसु.

६०९. अनापत्ति तमञ्ञस्स, भिक्खुनो परिभुञ्जतो;

अदेन्तस्स च निस्सट्ठं, दुक्कटं परियापुतं.

६१०. थेरे च दहरे मग्गं, गच्छन्तेसु उभोसुपि;

पत्तचीवरमादाय, ओहीने दहरे पन.

६११. असम्पत्ते गरुं तस्मिं, उग्गच्छत्यरुणो यदि;

होति निस्सग्गियं वत्थं, न पस्सम्भति निस्सयो.

६१२. मुहुत्तं विस्समित्वान, गच्छन्ते दहरे पन;

होति निस्सग्गियं वत्थं, पस्सम्भति च निस्सयो.

६१३. सुता धम्मकथा यस्मिं, उग्गच्छत्यरुणो यदि;

होति निस्सग्गियं वत्थं, पस्सम्भति च निस्सयो.

६१४. पच्चुद्धारे अनापत्ति, लद्धसम्मुतिकस्सपि;

अन्तोयेवारुणे तं वा, विस्सज्जेति विनस्सति.

६१५. पठमेन समानाव, समुट्ठानादयो नया;

अपच्चुद्धरणं एत्थ, अक्रियाति विसेसितं.

दुतियकथिनकथा.

६१६. अकालचीवरं मास-परमं निक्खिपे सति;

पच्चासाय ततो उद्धं, ठपेतुं न च वट्टति.

६१७. दसाहातिक्कमोयेव;

पठमे कथिने इध;

मासस्सातिक्कमो वुत्तो;

सेसो तेन समो मतो.

ततियकथिनकथा.

६१८. भिक्खु भिक्खुनिया भुत्तं, वत्थं अञ्ञातिकाय यो;

धोवापेति रजापेति, आकोटापेति चे ततो.

६१९. तस्स निस्सग्गियापत्ति, पठमेन पकासिता;

तथा सेसेहि च द्वीहि, दीपितं दुक्कटद्वयं.

६२०. सिक्खमानाय वा हत्थे, धोवनत्थाय देति चे;

सा हुत्वा उपसम्पन्ना, पच्छा धोवति सो नयो.

६२१. सामणेरनिद्देसेपि, लिङ्गं चे परिवत्तति;

भिक्खुनीसुपसम्पज्ज, धोते निस्सग्गियं सिया.