गण्डाबाधकथा

गण्डाबाधकथायं ‘‘अनुजानामि, भिक्खवे, सत्थकम्म’’न्ति (महाव. २६७) वचनतो गण्डाबाधे सति सत्थकम्मं कातब्बं. ‘‘अनुजानामि, भिक्खवे, कसावोदक’’न्ति (महाव. २६७) वचनतो कसावोदकेन अत्थे सति कसावोदकं दातब्बं. ‘‘अनुजानामि, भिक्खवे, तिलकक्क’’न्ति (महाव. २६७) वचनतो तिलकक्केन अत्थे सति तिलकक्कं दातब्बं. तिलकक्केन अत्थोति पिट्ठेहि तिलेहि अत्थो. ‘‘अनुजानामि भिक्खवे कबळिक’’न्ति (महाव. २६७) वचनतो कबळिकाय अत्थे सति कबळिका दातब्बा. तत्थ कबळिकन्ति वणमुखे सत्तुपिण्डं पक्खिपितुं. ‘‘अनुजानामि, भिक्खवे, वणबन्धनचोळ’’न्ति (महाव. २६७) वचनतो वणबन्धनचोळेन अत्थे सति वणबन्धनचोळं दातब्बं. ‘‘अनुजानामि, भिक्खवे, सासपकुट्टेन फोसितु’’न्ति (महाव. २६७) वचनतो सचे वणो कुण्डवती, सासपकुट्टेन फोसितब्बं. तत्थ सासपकुट्टेनाति सासपपिट्ठेन.

‘‘अनुजानामि, भिक्खवे, धूमं कातु’’न्ति (महाव. २६७) वचनतो यदि वणो किलिज्जित्थ, धूमं कातुं वट्टति. ‘‘अनुजानामि, भिक्खवे, लोणसक्खरिकाय छिन्दितु’’न्ति (महाव. २६७) वचनतो यदि वड्ढमंसं वुट्ठाति, छिन्दितब्बं. तत्थ वड्ढमंसन्ति अधिकमंसं आणी विय उट्ठहति. लोणसक्खरिकाय छिन्दितुन्ति खारेन छिन्दितुं. ‘‘अनुजानामि, भिक्खवे, वणतेल’’न्ति (महाव. २६७) वचनतो यदि वणो न रुहति, वणरुहनतेलं पचितब्बं. ‘‘अनुजानामि, भिक्खवे, विकासिकं सब्बं वणपटिकम्म’’न्ति (महाव. २६७) वचनतो यदि तेलं गळति, विकासिकं दातब्बं, सब्बं वणपटिकम्मं कातब्बं. तत्थ विकासिकन्ति तेलरुन्धनपिलोतिकं. सब्बं वणपटिकम्मन्ति यं किञ्चि वणपटिकम्मं नाम अत्थि, सब्बं अनुजानामीति अत्थो. महाविकटकथा पुब्बे वुत्ताव.

सामं गहेत्वाति इदं न केवलं सप्पदट्ठस्सेव, अञ्ञस्मिम्पि दट्ठविसे सति सामं गहेत्वा परिभुञ्जितब्बं, अञ्ञेसु पन कारणेसु पटिग्गहितमेव वट्टति.