आसन्दादिकथा

५५. आसन्दादिकथायं चतुरस्सपीठन्ति समचतुरस्सं. अट्ठङ्गुलपादं वट्टतीति अट्ठङ्गुलपादकमेव वट्टति. पमाणातिक्कन्तोपि वट्टतीति समचतुरस्समेव सन्धाय वुत्तं. आयतचतुरस्सा पन सत्तङ्गपञ्चङ्गापि उच्चपादा न वट्टन्ति. वेत्तेहेव चतुरस्सादिआकारेन कतं भद्दपीठन्ति आह ‘‘वेत्तमयपीठ’’न्ति. दारुपट्टिकाय उपरीति अटनिआकारेन ठितदारुपटलस्स हेट्ठा. उद्धं पादं कत्वा पवेसनकालञ्हि सन्धाय ‘‘उपरी’’ति वुत्तं. एळकस्स पच्छिमपादद्वयं विय वङ्काकारेन ठितत्ता पनेतं ‘‘एळकपादपीठ’’न्ति (वि. वि. टी. चूळवग्ग २.२९७) वुत्तं.