ततोनीहटकथा

ततो नीहटकथायं ‘‘पटिग्गण्हथ, भिक्खवे, परिभुञ्जथ. अनुजानामि, भिक्खवे, ततो नीहटं भुत्ताविना पवारितेन अनतिरित्तं परिभुञ्जितु’’न्ति (महाव. २७६) वचनतो यस्मिं दाने निमन्तिता हुत्वा भिक्खू भुञ्जन्ति, ततो दानतो नीहटं भोजनं पवारितेन भिक्खुना भुञ्जितब्बं, न पवारितसिक्खापदेन आपत्ति होति. वुत्तञ्हि अट्ठकथायं (महाव. अट्ठ. २७६) ‘‘ततो नीहटन्ति यत्थ निमन्तिता भुञ्जन्ति, ततो नीहट’’न्ति.