८. दुब्बण्णकरणसिक्खापदवण्णना

३६८. अट्ठमे पटिलद्धनवचीवरेनाति एत्थ पुब्बे अकतकप्पं कतिपाहं निवासनत्थाय तावकालिकवसेन लद्धम्पि सङ्गय्हतीति वदन्ति.

३६९. ‘‘नवं नाम अकतकप्प’’न्ति सामञ्ञतो वुत्तत्ता अञ्ञेन भिक्खुना कप्पबिन्दुं दत्वा परिभुत्तं चीवरं, तेन वा, ततो लभित्वा अञ्ञेन वा केनचि दिन्नम्पि कतकप्पमेव नवं नाम न होतीति दट्ठब्बं. ‘‘निवासेतुं वा पारुपितुं वा’’ति वुत्तत्ता अंसबद्धकासावम्पि पारुपितब्बतो कप्पं कातब्बन्ति वदन्ति. चम्मकारनीलं नाम चम्मं नीलवण्णं कातुं योजियमानं नीलं. पकतिनीलमेवाति केचि. यथावुत्तचीवरस्स अकतकप्पता, अनट्ठचीवरादिता, निवासनादिताति तीणि अङ्गानि.

दुब्बण्णकरणसिक्खापदवण्णना निट्ठिता.