७. महानामसिक्खापदवण्णना

३०३. सत्तमे महानामोति सुक्कोदनस्स पुत्तो अनुरुद्धत्थेरस्स, सत्थु च जेट्ठभाता. आनन्दत्थेरो अमितोदनस्स पुत्तो, नन्दत्थेरो पन सुद्धोदनस्सेव.

३०५. पाळियं कालं आहरिस्सथाति अज्जतनं कालं वीतिनामेस्सथ, स्वे भेसज्जं हरिस्सथाति वा अत्थो. ‘‘अत्थि पवारणा भेसज्जपरियन्ता च रत्तिपरियन्ता चा’’ति ततियकोट्ठासे नियमितमेव भेसज्जं नियमितकालन्तरेयेव गहेतब्बं, न ततो बहि. इतरथा विसुं पयोजनं नत्थीति दट्ठब्बं. सपरियन्ता सङ्घपवारणा, तदुत्तरि भेसज्जविञ्ञत्ति, अगिलानताति इमानेत्थ तीणि अङ्गानि.

महानामसिक्खापदवण्णना निट्ठिता.