१. आवसथपिण्डसिक्खापदवण्णना

२०६. चतुत्थवग्गस्स पठमे इमेसंयेवाति इमेसं पासण्डानंयेव. एत्तकानन्ति इमस्मिं पासण्डे एत्तकानं.

२०८. ‘‘गच्छन्तो वा आगच्छन्तो वा’’ति इदं अद्धयोजनवसेन गहेतब्बं. अञ्ञे उद्दिस्स पञ्ञत्तञ्च भिक्खूसु अप्पसन्नेहि तित्थियेहि सामञ्ञतोपि पञ्ञत्तम्पि भिक्खूनं न वट्टति एव. आवसथपिण्डता, अगिलानता, अनुवसित्वा भोजनन्ति इमानेत्थ तीणि अङ्गानि.

आवसथपिण्डसिक्खापदवण्णना निट्ठिता.