९. परिपाचितसिक्खापदवण्णना

१९७. नवमे पाळियं ‘‘सिक्खमाना…पे… पञ्च भोजनानि ठपेत्वा सब्बत्थ अनापत्ती’’ति इदं इमिना सिक्खापदेन अनापत्तिं सन्धाय वुत्तं. पञ्चहि सहधम्मिकेहि कतविञ्ञत्तिपरिकथादीहि उप्पन्नं परिभुञ्जन्तस्स दुक्कटमेव. भिक्खुनिया परिपाचितता, तथा जाननं, गिहिसमारम्भाभावो, भोजनता, तस्स अज्झोहरणन्ति इमानेत्थ पञ्च अङ्गानि.

परिपाचितसिक्खापदवण्णना निट्ठिता.