७. निक्कड्ढनसिक्खापदवण्णना

१२६. सत्तमे कोट्ठकानीति द्वारकोट्ठकानि.

१२८. ‘‘सकलसङ्घारामतो निक्कड्ढितुं न वट्टती’’ति इदं अननुरूपतो वुत्तं. पापगरहिताय हि अकुपितचित्तेन निक्कड्ढापेन्तस्स इमिना सिक्खापदेन आपत्ति नत्थि ‘‘कुपितो अनत्तमनो’’ति वुत्तत्ता. अञ्ञापेक्खा आपत्ति न दिस्सति. पाळियं ‘‘अलज्जिं निक्कड्ढती’’तिआदीसु चित्तस्स लहुपरिवत्तिताय अन्तरन्तरा कोपे उप्पन्नेपि अनापत्ति अलज्जितादिपच्चयेनेव निक्कड्ढनस्स आरद्धत्ता. सङ्घिकविहारो, उपसम्पन्नस्स भण्डनकारकभावादिविनिमुत्तता, कोपेन निक्कड्ढनं वा निक्कड्ढापनं वाति इमानेत्थ तीणि अङ्गानि.

निक्कड्ढनसिक्खापदवण्णना निट्ठिता.