९. दुट्ठुल्लारोचनसिक्खापदवण्णना

७८. नवमे तत्थ भवेय्याति तत्थ कस्सचि मति एवं भवेय्य. अट्ठकथावचनमेव उपपत्तितो दळ्हं कत्वा पतिट्ठपेन्तो ‘‘इमिनापि चेत’’न्तिआदिमाह.

८२. आदितो पञ्च सिक्खापदानीति पाणातिपातादीनि पञ्च. सेसानीति विकालभोजनादीनि. सुक्कविस्सट्ठिआदि अज्झाचारोव. अन्तिमवत्थुं अनज्झापन्नस्स भिक्खुनो सवत्थुको सङ्घादिसेसो, अनुपसम्पन्नस्स आरोचनं, भिक्खुसम्मुतिया अभावोति इमानेत्थ तीणि अङ्गानि.

दुट्ठुल्लारोचनसिक्खापदवण्णना निट्ठिता.