१. पठमसिक्खापदवण्णना

९३४-५. एकाय निपन्नाय अपरा निपज्जति, आपत्ति पाचित्तियस्साति ‘‘उभिन्नम्पि पठमनिपन्नाय अनुट्ठापना’’ति वत्वा एत्थ किरियाकिरियन्ति एके, तं अट्ठकथाय विरुज्झति. ‘‘किरिय’’न्ति हि अट्ठकथायं वुत्तं. अथ कस्सा आपत्तीति? उभिन्नम्पि निपज्जनकिरियं पटिच्च. इमस्स अनापत्तिवारे ‘‘ववत्थानं दस्सेत्वा’’ति नत्थि, तस्मा ववत्थानं कत्वा निपज्जितुं न वट्टतीति एके. विपुलतरे वट्टतीति एके. ‘‘अन्तरं कत्वा निपज्जितुं वट्टती’’ति पोराणगण्ठिपदे लिखितं.

पठमसिक्खापदवण्णना निट्ठिता.