४. तुवट्टवग्गवण्णना

१. पठमसिक्खापदवण्णना

९३४-५. एकाय निपन्नाय अपरा निपज्जति, आपत्ति पाचित्तियस्साति ‘‘उभिन्नम्पि पठमनिपन्नाय अनुट्ठापना’’ति वत्वा एत्थ किरियाकिरियन्ति एके, तं अट्ठकथाय विरुज्झति. ‘‘किरिय’’न्ति हि अट्ठकथायं वुत्तं. अथ कस्सा आपत्तीति? उभिन्नम्पि निपज्जनकिरियं पटिच्च. इमस्स अनापत्तिवारे ‘‘ववत्थानं दस्सेत्वा’’ति नत्थि, तस्मा ववत्थानं कत्वा निपज्जितुं न वट्टतीति एके. विपुलतरे वट्टतीति एके. ‘‘अन्तरं कत्वा निपज्जितुं वट्टती’’ति पोराणगण्ठिपदे लिखितं.

पठमसिक्खापदवण्णना निट्ठिता.

२. दुतियसिक्खापदवण्णना

९४०. ववत्थानं दस्सेत्वाति एत्थ उपरि पारुपनम्पि मज्झे ओभोगं कत्वा उभिन्नं अन्तरे ओतारेति, वट्टतीति एके. ववत्थानञ्च यथा ठाने न तिट्ठति, तथा अतिक्कमित्वा तुवट्टेन्तिया आपत्तियेवाति. ‘‘किरियाकिरिय’’न्ति च पोराणगण्ठिपदे वुत्तं.

दुतियसिक्खापदवण्णना निट्ठिता.

३. ततियसिक्खापदवण्णना

९४१. अत्तनो सज्झायनट्ठाने चे वुड्ढतरा आगच्छति, वन्दनकाले वा, आपुच्छनकिच्चं नत्थि. एकस्मिं ओवरके आपुच्छितब्बं. ‘‘अथ ओवरके महाथेरी वसति, सम्मुखे इतरा, आपुच्छितब्बा तस्सा उपचारत्ता’’ति पोराणगण्ठिपदे वुत्तं.

ततियसिक्खापदवण्णना निट्ठिता.

९४६-९५०. चतुत्थपञ्चमसिक्खापदं उत्तानत्थमेव.

६. छट्ठसिक्खापदवण्णना

९५६. गहपति नाम ठपेत्वा सहधम्मिके वेदितब्बो, तस्मा भिक्खुना वा सामणेरेन वा अननुलोमिकेन संसग्गेन संसट्ठापि न समनुभासितब्बाति सम्भवति एव.

छट्ठसिक्खापदवण्णना निट्ठिता.

९६१-५. सत्तमअट्ठम सिक्खापदं उत्तानत्थमेव.

९. नवमसिक्खापदवण्णना

९६९. एकिन्द्रियन्ति कायिन्द्रियेनेव एकिन्द्रियं, निगण्ठानं अचेलकानं मतं. कापिला पन ‘‘पञ्चिन्द्रिया’’ति मञ्ञन्ता एवं वदन्ति ‘‘सचक्खुकत्ता अलाबुमालुवादयो यत्थ आलम्बनं, तत्थ गच्छन्ति. ससोतकत्ता कदलियो मेघगज्जितं सुत्वा गब्भं गण्हन्ति. सघानकत्ता पनसादयो कुणपगन्धेन फलन्ति. सजिव्हकत्ता उदकं पिवन्ति येन, सब्बेपि ‘पादपा’ति वुच्चन्ति. सकायपसादत्ता इत्थिसम्फस्सेन असोकरुक्खा पुप्फन्ती’’ति. सङ्घातन्ति विनासं.

९७०. इध च वस्सच्छेदेन दुक्कटं. पठमं आवसित्वा पच्छा चारिका चरणपच्चया पाचित्तियं आपज्जतीति वेदितब्बं. अथ वस्सं अवसित्वा चरति, अवस्सुपगमनपच्चया दुक्कटं आपज्जति. पोराणगण्ठिपदे पन ‘‘अन्तोसत्ताहे अन्तोवस्से चारिकं चरन्तिया पाचित्तियं. सत्ताहकरणीयेन पन वट्टति, भिक्खुनो दुक्कटं होती’’ति वुत्तं.

९७२. केनचि उब्बाळ्हाति वस्सच्छेदकारणेनाति नो तक्कोति आचरियो. कित्तावता चारिका होतीति? इदं न सब्बत्थ विचारितं. अनन्तरसिक्खापदे ‘‘अन्तमसो छप्पञ्चयोजनानिपी’’ति वुत्तत्ता सो च मञ्ञे हेट्ठिमपरिच्छेदोति.

नवमसिक्खापदवण्णना निट्ठिता.

१०. दसमसिक्खापदवण्णना

९७३. दसमे ‘‘आहुन्दरिका’’ति पठन्ति किर.

दसमसिक्खापदवण्णना निट्ठिता.

तुवट्टवग्गवण्णना निट्ठिता.