२. दुतियसङ्घादिसेससिक्खापदवण्णना

६८३. भटिपुत्तकानं कुमारभटिकानं गणा भटिपुत्तगणा. कप्पन्ति कप्पियं. कप्पगतिकन्ति कप्पियसभावं. पक्कन्तासुपीति अत्तनो परिसं ठपेत्वा इतरासु पक्कन्तासु. पण्णत्तिं अजानन्ता अरियापि वुट्ठापेन्तीति कत्वा वा कम्मवाचापरियोसाने आपत्तिक्खणे विपाकाब्याकतसमङ्गितावसेन वा ‘‘तिचित्त’’न्ति वुत्तन्ति वेदितब्बं. ‘‘पब्बाजने न दुक्कट’’न्ति पोराणगण्ठिपदे वुत्तं.

दुतियसङ्घादिसेससिक्खापदवण्णना निट्ठिता.