उपालिपञ्चकवण्णना

अनिस्सितवग्गवण्णना

४१९. कायिकउपघातिका नाम कायेन वीतिक्कमो.

नप्पटिप्पस्सम्भनवग्गवण्णना

४२०. ओमद्दकारकोति ओमद्दित्वा अभिभवित्वा कारको.

वोहारवग्गवण्णना

४२४. भेदकरवत्थूनि निस्साय विवादाधिकरणं समुट्ठाति, एवं यथासङ्ख्यं गच्छति. कोधोपनाहादिद्वादसमूलपयोगं विवादाधिकरणं, तथा सेसेसु. ओसारणादीसु नवसु ठानेसु कम्मञत्तिया करणं. द्वीसु ठानेसु ञत्तिदुतियञत्तिचतुत्थकम्मेसु. यस्मा महाअट्ठकथायं वुत्तनयेनेव उभतोविभङ्गा असङ्गहिता, तस्मा यं कुरुन्दियं वुत्तं, तं गहेतब्बन्ति सम्बन्धो.

दिट्ठाविकम्मवग्गवण्णना

४२५. तिण्णन्नं उपरि सह आपत्तिं देसेतुं न लब्भन्ति. कम्मनानासंवासकानं लद्धिग्गहितकोव लद्धिनानासंवासको. ‘‘अविप्पवाससीमाय ठितस्सा’’ति महासीमं किर सन्धाय वुत्तं.

४३३. ‘‘उम्मादा चित्तक्खेपा’’ति पाठो.

मुसावादवग्गवण्णना

४४४. परियायेन जानन्तस्साति यस्स कस्सचि जानन्तस्स परियायेन वुत्तमुसावादोति अत्थो.

४४६. अनुयोगो न दातब्बोति तेन वुत्तं अनादियित्वा तुण्ही भवितब्बन्ति अत्थो.

भिक्खुनोवादवग्गवण्णना

४५४. वोहारनिरुत्तियं सद्दनिरुत्तियं. मग्गपच्चवेक्खणादयो एकूनवीसति.

उब्बाहिकवग्गवण्णना

४५५. पसारेता मोहेता.

अधिकरणवूपसमवग्गवण्णना

४५८. ‘‘यथारत्तन्ति अनुपसम्पन्ने अपेक्खती’’तिपि वदन्ति. ‘‘यथावुड्ढन्ति उपसम्पन्ने अपेक्खती’’ति लिखितं.

कथिनत्थारवग्गवण्णना

४६७. ‘‘एकावत्तो’’तिपि पठन्ति, तस्स कुद्धो कोधाभिभूतोति किरत्थो. एकवत्थोतिपि केचि, उत्तरासङ्गं अपनेत्वा ठितोति किरत्थो, तं सब्बं अट्ठकथायं उद्धटपाळिया विरुज्झतीति. एकावट्टोति हि उद्धटं, तस्मा न गहेतब्बं. अन्तरा वुत्तकारणेनाति ‘‘किच्चयपसुतत्ता वन्दनं असमन्नाहरन्तो नलाटं पटिहञ्ञेय्या’’तिआदिवुत्तकारणेन.

उपालिपञ्चकवण्णना निट्ठिता.

आपत्तिसमुट्ठानवण्णना

४७०. पुब्बे वुत्तमेवाति सहसेय्यादिपण्णत्तिवज्जं. इतरन्ति सचित्तकं. देसेन्तो, दोमनस्सिको अञ्ञेहि भिंसापनादीनि कत्वा आपत्तिं आपज्जित्वाति अधिप्पायो.