८. वत्तक्खन्धकवण्णना

आगन्तुकवत्तकथावण्णना

३५७. एकस्मिं गामे अञ्ञविहारतो आगतोपि आगन्तुकोव. तत्थ केचि एवं वदन्ति ‘‘आवासिको कत्थचि गन्त्वा सचे आगतो, ‘तेनापि आगन्तुकभत्तं भुञ्जितब्ब’न्ति वुत्तत्ता दूरागमनं वुत्तं होति, न गामे, तस्मा न युत्त’’न्ति. ते वत्तब्बा ‘‘आगन्तुकभत्तं नाम गहट्ठेहि ठपितं. यस्मिं निबद्धं, ततो अञ्ञगामतोति आपन्नं. तथा विहाराधिकारत्ता अञ्ञविहारतो आगतोपि आगन्तुको वा’’ति आचरियानं सन्निट्ठानं. पानीयं पुच्छितब्बं, परिभोजनीयं पुच्छितब्बन्ति उद्धरित्वा घटसरावादिगतं सन्धाय पठमं, दुतियं कूपतळाकादिगतन्ति आचरियो. दुतियवारे अत्तनो वसनट्ठानत्ता विसुं पुच्छितब्बमेव, तस्मा वुत्तं एतं ‘‘परिच्छिन्नभिक्खो वा गामो’’ति. बहूसु पोत्थकेसु दुविधापि युज्जति.

अनुमोदनवत्तकथावण्णना

३६२-४. पञ्चमे अनुमोदनत्थाय निसिन्ने. ‘‘मनुस्सानं परिविसनट्ठानन्ति यत्थ मनुस्सा सपुत्तदारा आवसित्वा देन्ती’’ति लिखितं. इमस्मिं खन्धके आगन्तुकावासिकगमिकानुमोदनभत्तग्गपिण्डचारिकारञ्ञकसेनासनजन्ताघरवच्चकुटिउपज्झाचरियसद्धिविहारिकन्तेवासिकवत्तानि चुद्दस महावत्तानि नाम. अग्गहितग्गहणेन गणियमानानि असीति खन्धकवत्तानि नाम होन्ति.

वत्तक्खन्धकवण्णना निट्ठिता.