९. पातिमोक्खट्ठपनक्खन्धकवण्णना

पातिमोक्खुद्देसयाचनकथावण्णना

३८३-४. ‘‘नन्दिमुखी’’ति लिखितं. आयतकेनेवाति आदिम्हि एव. यन्ति यस्मा. सवन्तियो महानदियो. ‘‘महन्तभूतान’’न्ति पाठो. पत्ताति पत्वा. ‘‘समूलिकाय ठपेति अकताया’’ति ठपनकस्स सञ्ञामूलवसेन वुत्तं. तं वत्थुं अविनिच्छिनित्वाव परिसा वुट्ठाति.

अत्तादानअङ्गकथावण्णना

३९८-९. ‘‘अत्तादानन्ति सयं परेहि चोदितो अत्तानं सोधेतुं अनादियित्वा परेसं विप्पटिपत्तिं दिस्वा सासनं सोधेतुं अत्तना आदितब्ब’’न्ति लिखितं. वस्सारत्तोति वस्सकालो. सप्पटिमासोति आकड्ढनयुत्तोति अधिप्पायो.

४०१. उपदहातब्बोति उप्पादेतब्बो, विप्पटिसारमुखेन धारेतब्बोति अधिप्पायो.

पातिमोक्खट्ठपनक्खन्धकवण्णना निट्ठिता.