६. चारित्तसिक्खापदवण्णना

२९४. सभत्तोति निमन्तनभत्तोति पोराणा.

पुरेभत्तञ्च पिण्डाय, चरित्वा यदि भुञ्जति;

सिया परम्परापत्ति, पच्छाभत्तं न सा सिया.

पच्छाभत्तञ्च गमिको, पुब्बगेहं यदि गच्छे;

एके आपत्तियेवाति, अनापत्तीति एकच्चे.

कुलन्तरस्सोक्कमने, आपत्तिमतयो हि ते;

समानभत्तपच्चासा, इति आहु इधापरे.

मता गणिकभत्तेन, समेन्ति नं निमन्तने;

विस्सज्जनं समानन्ति, एके सम्मुखतापरे.

सन्निट्ठानत्थिकेहेव, विचारेतब्बभेदतो;

विञ्ञू चारित्तमिच्चेव, सिक्खापदमिदं विदूति.

चारित्तसिक्खापदवण्णना निट्ठिता.