२. दुतियपाटिदेसनीयसिक्खापदवण्णना

५५९. ‘‘निमन्तिता भुञ्जन्तीति पञ्चन्नं भोजनानं अञ्ञतरेन भोजनेन निमन्तिता भुञ्जन्ती’’ति किञ्चापि वुत्तं, अथ खो अकप्पियनिमन्तनेन निमन्तितता एत्थ न अङ्गं, मातिकाट्ठकथायं वा इध वा अनापत्तिवारे लेसाभावतो, तस्मा ‘‘निमन्तिता’’ति पदस्स अत्थो पुब्बे आचिण्णवसेनेव वुत्तो. अपरेपि तयो तिकच्छेदा योजेत्वा दस्सेतब्बा पदभाजने वुत्तत्ताति वेदितब्बं. यथा तथा हि भुञ्जन्तानं तादिसं भिक्खुनिं अवारेन्तानं पाटिदेसनीयमेव. ‘‘एसा वोसासति नाम, वोसासन्ती’’ति च दुविधो पाठो. ‘‘अज्झोहारे अज्झोहारे’’ति वचनेन पुन ‘‘गारय्हं आवुसो धम्म’’न्ति एकवचनं विरुद्धन्ति. पठमं अज्झोहारेयेव आपन्नं सन्धाय वुत्तं, तथा अञ्ञत्रापि आगच्छति ‘‘आपज्जिम्हा’’ति वचनतो. एकेन बहूनम्पि वट्टतीति केचि, तं न सुन्दरं. ‘‘तेहि भिक्खूही’’तिआदिना पाठे वुत्तत्ताति मम तक्को. एकेन सहेव ‘‘अहं आपज्जि’’न्तिपि वत्तब्बन्ति एकेन द्वीहि तीहि देसेतब्बतो, सब्बेहि एवं वत्तुं वट्टति. ‘‘आपज्जिम्हाति सहेवा’’ति वदन्ति. एकेन चे अवारितो, ‘‘अहं, आवुसो, गारय्हं धम्मं आपज्जि’’न्तिपि वत्तब्बं.

दुतियपाटिदेसनीयसिक्खापदवण्णना निट्ठिता.

५६२-५७०. ततियचतुत्थसिक्खापदानि उत्तानत्थानियेव.

पाटिदेसनीयकण्डवण्णना निट्ठिता.