५. वालसुत्तवण्णना

१११५. उपासनन्ति आचरियउपासनं, आचरियं अन्तेवासिना वा दिवसे दिवसे सिक्खनवसेन उपासितब्बतो उपासनन्ति लद्धनामं कण्डखिपनसिप्पं. कण्डं अतिक्कमन्तेति सरं खिपन्ते. पोङ्खानुपोङ्खन्ति पोङ्खसद्दत्थं पाकटं कत्वा दस्सेतुं ‘‘एकं कण्डं खिपित्वा’’तिआदि वुत्तं. अपरं अनुपोङ्खन्ति एत्थ अपरन्ति ततियकण्डं. अनुपोङ्खं नाम इदन्ति दस्सेतुं ‘‘अनुपोङ्खं नाम दुतियस्स पोङ्ख’’न्ति वुत्तं. तञ्हि ततियेन सरेन विज्झीयति. पुन अपरं तस्स पोङ्खन्ति इदं पन अपरापरं अविरज्झनं दस्सेतुं वुत्तं. दुरभिसम्भवतरन्ति अभिभवितुं असक्कुणेय्यतरं. वालन्ति केसं. सत्तधा भिन्दित्वाति सत्तक्खत्तुं विफालेत्वा. तस्स एकं भेदन्ति तस्स केसस्स एकं अंसुसङ्खातं भेदं गहेत्वा. वातिङ्गणमज्झे बन्धित्वाति वातिङ्गणफलस्स मज्झट्ठाने बन्धित्वा. अपरं भेदन्ति अपरं केसस्स अंसुसङ्खातं भेदं. अग्गकोटियं बन्धित्वाति यथा तस्स वालभेदस्स ऊकामत्तं लिखामत्तं वा कण्डस्स अग्गकोटिं अधिकं हुत्वा तिट्ठति, एवं बन्धित्वा. उसभमत्तेति वीसतियट्ठिमत्ते ठाने ठितो. कण्डबद्धाय कोटियाति कण्डबद्धाय वालस्स कोटिया वातिङ्गणबन्धनवालस्स कोटिं पटिविज्झेय्य.