८. दुतियछिग्गळयुगसुत्तवण्णना

१११८. अधिच्चुप्पत्तिकन्ति यदिच्छावसेन उप्पज्जनकं. छिग्गळेनाति छिग्गळपदेसेन. छिग्गळुपरीति हेट्ठिमयुगस्स छिग्गळपदेसस्स उपरि. आरुळ्हस्स छिग्गळेनाति उभिन्नम्पि छिद्देन. गीवप्पवेसनं वियाति चतुन्नं युगानं छिद्दपदेसेनेव उपरूपरि ठितानं छिद्दन्तरेन काणकच्छपस्स गीवप्पवेसनं अधिच्चतरसम्भवं. ततोपि अधिच्चतरसम्भवो मनुस्सत्तलाभो, ततो अधिच्चतमसम्भवो अरियमग्गपटिलाभोति दस्सेन्तो आह ‘‘चतुसच्चपटिवेधो अतिविय अधिच्चतरसम्भवो’’ति.

पपातवग्गवण्णना निट्ठिता.