१. पठममिगजालसुत्तवण्णना

६३. चक्खुविञ्ञाणं दस्सनकिच्चन्ति वुत्तचक्खुविञ्ञाणेन पस्सितब्बन्ति आह ‘‘इट्ठारम्मणभूता’’ति. कमनीयाति कामेतब्बा. मनं अप्पायन्तीति मनापाति आह ‘‘मनवड्ढनका’’ति. पियायितब्बसभावा पियरूपा. कामूपसंहिताति कामपटिसंयुत्ता. आलम्बितब्बता एव चेत्थ उपसंहितताति ‘‘आरम्मणं कत्वा’’तिआदिमाह. तण्हासङ्खाता नन्दी तण्हानन्दी, न तुट्ठिनन्दीयेव ‘‘नन्दिं चरती’’तिआदीसु विय. गामन्तन्ति गामसमीपं. ‘‘अनुपचारट्ठान’’न्ति वत्वा तं दस्सेति ‘‘यत्था’’तिआदिना.

एत्थाति यथानीहते पाठे. ‘‘इमं एकं परियायं ठपेत्वा’’ति वुत्तं तस्स ‘‘पन्तानी’’तिपदेन सङ्गहितत्ता. अप्पसद्दानि अप्पनिग्घोसानीति एत्थ अप्प-सद्दो अभावत्थो.

पठममिगजालसुत्तवण्णना निट्ठिता.