५. सब्बअनिच्चवग्गवण्णना

४३-५२. ञातपरिञ्ञा आगता विसयवसेन तब्बिसयस्स धम्मस्स जोतितत्ता. इतरा द्वे तीरणपहानपरिञ्ञापि आगता एवाति वेदितब्बा, तासं अभिञ्ञेय्यधम्मविसयत्ता ञाणस्स च तीरणपहानपरिञ्ञासम्भवतो. परिञ्ञेय्यपदे तीरणपरिञ्ञाव आगता, पहातब्बपदे पहानपरिञ्ञाव आगताति योजना. इतरापि द्वे गहितायेव ताहि विना अत्थसिद्धिया अभावतो. पच्चक्खं कातब्बं आरम्मणतो असम्मोहतो पटिविज्झनेन. अवुत्तापि गहितायेव परिजाननस्स यावदेव पहानत्थत्ता. एकसभावेन विनाभावो अनेकग्गट्ठो. उपसट्ठरोगेन विय अन्तो एव अभिहतसब्बता उपहतट्ठो.

सब्बअनिच्चवग्गवण्णना निट्ठिता.

पठमो पण्णासको.