९-१०. इन्द्रियसम्पन्नसुत्तादिवण्णना

१५४-१५५. ‘‘सम्पन्नसीला, भिक्खवे, विहरथा’’तिआदीसु (म. नि. १.६४) विय परिपुण्णत्थो इध सम्पन्न-सद्दोति आह ‘‘परिपुण्णिन्द्रियो’’ति. इन्द्रियेहि समन्नागतत्ता परिपुण्णिन्द्रियो नाम होतीति सम्बन्धो. एवं सति समन्नागमसम्पत्ति वुत्ता होतीति आसङ्कन्तो ‘‘चक्खादीनि वा’’तिआदिमाह. तं सन्धायाति दुतियविकप्पेन वुत्तमत्थं सन्धाय. हेट्ठा खन्धियवग्गे खन्धवसेन देसना आगता, इध आयतनवसेनाति आह ‘‘वुत्तनयमेवा’’ति.

इन्द्रियसम्पन्नसुत्तादिवण्णना निट्ठिता.

नवपुराणवग्गवण्णना निट्ठिता.

ततियो पण्णासको.