४. दुतियहालिद्दिकानिसुत्तवण्णना

४. चूळछक्कपञ्हेति मूलपण्णासे चूळतण्हासङ्खयसुत्ते (म. नि. १.३९० आदयो). महासक्कपञ्हेपीति महातण्हासङ्खयसुत्तेपि (म. नि. १.३९६ आदयो). एतन्ति ‘‘ये ते समणब्राह्मणा’’तिआदिसुत्तपदं. तण्हा सम्मदेव खीयति एत्थाति तण्हासङ्खयो, असङ्खता धातूति आह ‘‘तण्हासङ्खये निब्बाने’’ति. अन्तं अतिक्कन्तनिट्ठाति अन्तरहितनिट्ठा. तेनाह ‘‘सततनिट्ठा’’ति. सेसपदेसूति ‘‘अच्चन्तयोगक्खेमिनो’’तिआदीसु.

दुतियहालिद्दिकानिसुत्तवण्णना निट्ठिता.