५. समाधिसुत्तवण्णना

५. समाधीति अप्पनासमाधि, उपचारसमाधि वा. कम्मट्ठानन्ति समाधिपादकं विपस्सनाकम्मट्ठानं. ‘‘फातिं गमिस्सती’’ति पाठो. पत्थेतीति ‘‘अहो वत मे ईदिसं रूपं भवेय्या’’ति. अभिवदतीति तण्हादिट्ठिवसेन अभिनिवेसं वदति. तेनाह ‘‘ताय अभिनन्दनाया’’तिआदि. ‘‘अहो पियं इट्ठ’’न्ति वचीभेदे असतिपि तथा लोभुप्पादे सति अभिवदतियेव नाम. तेनाह ‘‘वाचं अभिन्दन्तो’’ति. ‘‘मम इद’’न्ति अत्तनो परिणामेत्वा अनञ्ञगोचरं विय कत्वा गण्हन्तो अज्झोसाय तिट्ठति नामाति दस्सेन्तो आह ‘‘गिलित्वाति परिनिट्ठपेत्वा गण्हाती’’ति. ‘‘अभिनन्दती’’तिआदयो पुब्बभागवसेन वुत्ता, ‘‘उप्पज्जति नन्दी’’ति द्वारप्पत्तवसेन. पठमेहि पदेहि अनुसयो, पच्छिमेन परियुट्ठानन्ति केचि ‘‘गहणट्ठेन उपादान’’न्ति कत्वा. नाभिनन्दति नाभिवदतीति एत्थ हेट्ठा वुत्तविपरियायेन अत्थो वेदितब्बो. न ‘‘इट्ठं कन्त’’न्ति वदतीति ‘‘इट्ठ’’न्ति न वदति, ‘‘कन्त’’न्ति न वदति. नाभिवदतियेव तण्हाय अनुपादियत्ता.

समाधिसुत्तवण्णना निट्ठिता.