४. पठमसङ्गामसुत्तवण्णना

१२५. वेदेन ञाणेन ईहति इरियतीति वेदेही, कोसलराजभगिनी अजातसत्तुनो माता, सा किर सम्पजञ्ञजातिका. तेनाह ‘‘पण्डिताधिवचन’’न्ति, चत्तारि अङ्गानि एतिस्सन्ति चतुरङ्गिनी. द्विन्नं रज्जानन्ति कासिकरज्जमगधरज्जानं अन्तरे, सो पन गामो कासिकरज्जो.

पापाति लामका निहीनाचारा. मेज्जति सिनिय्हतीति मेत्ति, सा एतेसु अत्थीति मित्ता. सह अयन्ति पवत्तन्तीति सहाया. सम्पवङ्कन्ति सुट्ठु ओनतं. जयकारणं दिस्वा आह, तथा हि ‘‘अज्ज इमं रत्तिं दुक्खं सेती’’ति कालपरिच्छेदवसेन वुत्तं. वेरिघातो नाम वेरिपुग्गले सतीति आह ‘‘वेरिपुग्गलं लभती’’ति.

पठमसङ्गामसुत्तवण्णना निट्ठिता.