६. कुलावकसुत्तवण्णना

२५२. रथसद्दोति रथालङ्कारभूतानं किङ्किणिकजालादीनं सद्दो. तथा धजसद्दो. आजानीयसद्दोति आजानीयानं हसितसद्दो च. करुणासमावज्जितहदयोति पाणानं अनुपरोधेन पणामितचित्तो. ईसामुखेनाति रथकप्परमुखेन. पुञ्ञपच्चयनिब्बत्तोति उळारं सुविपुलं पुञ्ञं पच्चयं कत्वा निब्बत्तो. न सज्जति कत्थचि अप्पटिघट्टनेन गच्छन्तो. सिम्बलिवनेनाति सिम्बलिवनमज्झेन. विभग्गं निम्मथितन्ति इतो चितो विभग्गञ्चेव निरवसेसतो मथितञ्च होति.

कुलावकसुत्तवण्णना निट्ठिता.