९. कुटिकासुत्तवण्णना

१९. अन्तोति कुच्छिअब्भन्तरे. वसनट्ठानट्ठेनाति वसनभावेन. कुलपवेणिन्ति कुलाचारं कुलतन्तिं. सन्तानकट्ठेनाति कुलसन्ततिया बन्धनभावेन. एवं सब्बपदेहि पुच्छितत्थस्स अनुजाननवसेन ‘‘एकंसवचने निपातो’’ति वुत्तं. आपादिका पोसिका मातुच्छा महापजापति माता एवाति कत्वा ‘‘पहाय पब्बजितत्ता’’ति अविसेसतो वुत्तं. पहाय पब्बजितत्ता नत्थीति आनेत्वा सम्बन्धो. पुन मातुकुच्छिवासादीनं अभाववचनेनेव वट्टम्हि बन्धनस्स अभावो दीपितो होतीति न गहितो. अयं किर देवता यथा पुथुज्जना बुद्धानं गुणे न जानन्ति, एवं न जानाति, तस्मा ‘‘मया सन्नाहं बन्धित्वा’’तिआदिमाह.

कुटिकासुत्तवण्णना निट्ठिता.